سەرۆکی حکوومەتی هەرێمی کوردستان لەگەڵ باڵیۆزی ژاپۆن لە عێراق کۆبووەوە و جەختی لە گرنگیی سوودوەرگرتن لە ئەزموونی ئەو وڵاتە لە بوارەکانی پیشەسازی و گەشەپێدانی ئابووریدا کردەوە. باڵیۆزی ژاپۆنیش بەردەوامیی پڕۆژەکانیان لە ڕێگەی ئاژانسی جایکاوە دووپات کردەوە.
ڕۆژی سێشەممە 23ـی ئەیلوولی 2025، مەسرور بارزانی، سەرۆکی حکوومەتی هەرێمی کوردستان، پێشوازیی لە ئەکیرا ئیندۆ، باڵیۆزی ژاپۆن لە عێراق کرد.
لە دیدارێکدا، گفتوگۆ لەبارەی پەرەپێدانی پەیوەندییەکانی نێوان ژاپۆن و هەرێمی کوردستان، دۆخی گشتیی عێراق و ئامادەکارییەکانی هەڵبژاردنی داهاتووی ئەنجومەنی نوێنەران کرا.
هاوکات باڵیۆزی ژاپۆن باسی لە کار و چالاکی و پڕۆژەکانیان لە هەرێمی کوردستان کرد، کە لە ڕێگەی ئاژانسی جایکاوە، چەندین پڕۆژەی جۆراوجۆر ئەنجام دەدەن.
لەلایەن خۆیەوە، سەرۆکی حکوومەت سوپاس و پێزانینی هەرێمی کوردستانی بۆ هاریکاری و پشتیوانییەکانی ژاپۆن دەربڕی و جەختی لە گرنگیی سوودوەرگرتن لە شارەزایی و ئەزموونی دەوڵەمەندی ژاپۆن لە بوارەکانی پیشەسازی، پەروەردە و گەشەپێدانی ئابووریدا کردەوە.
