نزیکەی هەزار شاخەوان لە لای تیبەتی ئێڤرێست، بەرزترین لووتکەی جیهان، لە دۆخێکی زریانی بەفریی تونددا گیر دەخۆن. بەرپرسانی چین ڕایان گەیاندووە کە تا ئێستا لانی کەم ٣٥٠ کەس لەلایەن تیمەکانی فریاگوزاریی ناوخۆییەوە ڕزگار کراون. بەڵام هێشتا ژمارەیەکی زۆر لە شاخەوانەکان لە بەرزایی ٤٩٠٠ مەتریدا لەنێو بەفردا گەمارۆ دراون. لە لای نیپاڵیش، بارانبارینی توند بووەتە هۆی داڕمانی زەوی و لافاو، و لانی کەم ٤٧ کەس گیانیان لە دەست داوە.
بە گوێرەی ڕاپۆرتی تەلەڤزیۆنی دەوڵەتی چین، ئەم ڕووداوە لە کۆتایی هەفتەدا ڕووی دا و شاخەوانەکان لەنێو بەفر و زریانی تونددا لە کەمپەکانیان لە بەرزایی ٤٩٠٠ مەتریدا گیران. تیمەکانی فریاگوزاریی ناوخۆیی ڕۆژی یەکشەممە ٥ی ئۆکتۆبەر توانییان بەشێک لە شاخەوانەکان لە چادرە داپۆشراوەکانی بەفر دەرباز بکەن و بیانگوازنەوە بۆ گوندێک لە بەرزایی نزمتر لە تیبت.
پلاتفۆرمی هەواڵیی دەوڵەتیی “جیمۆ نیوز” ڕایگەیاندووە هێشتا ژمارەیەکی زۆر لە شاخەوانەکان لە دامێنی ڕۆژهەڵاتی ئێڤرێستدا گیر دەخۆن. ئەم ناوچەیە لەگەڵ دامێنی باکوور، شوێنێکی دڵخوازە بۆ شاخەوانە چینییەکان، بەتایبەتی لە مانگی ئۆکتۆبەردا کە بە گشتی کەشوهەوا جێگیرە. ڕاپۆرتەکان باس لە بوونی قوربانی لە شوێنی ڕووداوەکە دەکەن، بەڵام تا ئێستا زانیاریی پشتڕاستکراو لەبارەی گیانلەدەستدانەکان بڵاو نەکراوەتەوە.
دامێنی باکووری ئێڤرێست وەک ڕێگەیەکی تا ڕادەیەک ئاسان بۆ سەرکەوتن ناسراوە، بەڵام دیار نییە کە ئایا ئەم ناوچەیەیش لەژێر کاریگەریی زریان و برووسکەدایە یان نا. بەرپرسانی تیبەتی فرۆشتنی بلیتیان بۆ ناوچەی ئێڤرێست تا کاتێکی نادیار ڕاگرتووە.
ئێڤرێست بە بەرزایی ٨٨٤٨ مەتر، بەرزترین شاخی جیهانە و ساڵانە هەزاران شاخەوان لە سەرانسەری جیهانەوە بۆ لای خۆی ڕادەکێشێت. لای تیبەتی (باکووری) بە گشتی لەلایەن شاخەوانە چینییەکانەوە پەسەند دەکرێت، لە کاتێکدا لای نیپاڵی (باشووری) ڕێگەیەکی دڵخوازترە بۆ گەشتیارە نێودەوڵەتییەکان. مانگی ئۆکتۆبەر زۆرجار وەک وەرزی گونجاو بۆ سەرکەوتن دادەنرێت، چونکە کەشوهەوا بە گشتی وشک و جێگیرە.
بەڵام گۆڕانکارییەکانی کەشوهەوای ئەم دواییانە بووەتە هۆی زیادبوونی ڕووداوە چاوەڕواننەکراوەکان وەک کڕێوە و بەفربارین و لافاو لە هیمالایا.
