سەعدی دەروێش موراد ئەلخەتاری، بەربژێرێ هەژمارە (3) ل سەر لیستا (275) یا پارتی دیموکراتی کوردستان (پ.د.ک) بۆ پەرلەمانێ عیراقێ ل بازنەیا نەینەوا، راگەهاند کو ئارمانجا وی یا سەرەکی خزمەتکرنا “گەلێ مە یێ رێزدار” و داکۆکیکرن ل ماف و داخوازێن وان یێن رەوایە.
ئەڤ بەربژێرێ پارتی بۆ ئاژانسا نووچەیا زاگرۆس دیار کر، کاندیدبوونا وی “نە حەز و تەماحەکا کەسییە، بەلکو بەلێن و بەرپرسیاریەتیە.” ئەلخەتاری بەلێن دا کو ببیتە “دەنگێ راستگۆ یێ خەلکی ل پەرلەمانی” و “ب هەمی دلۆڤانی و سۆزەکێڤە کار بکەت بۆ بجهئینانا دادپەروەرییا جڤاکی، پێشکێشکرنا خزمەتگوزارییان، پاراستنا دەستکەفتێن گەلێ مە، و هەنگاڤ هاڤێژتن بەرەڤ ئایندەیەکێ باشتر بۆ زارۆکێن مە.”
سەعدی دەروێش موراد ئەلخەتاری متمانەیا دەنگدەران “سەرمایێ منێ راستەقینە” وەسف کر و گۆت: “هێز و ئیرادەیا بەردەوامبوونێ ل سەر ڤێ رێکێ ژ هەوە وەردگرم. هـین پالپشت و پشتەڤانێن منن و بێی پشتەڤانیا متمانەیا هەوە ئارمانجێن مە بجهـ نائێن.”
ئەلخەتاری بەربژێرێ پ.د.ک داخوازی ژ گەل کر کو پێکڤە راوستن “دەست ل دەست، بۆ ئاڤاکرنا وەلاتەکێ هێمن و ئاڤەدان، کو دادپەروەری و یەکسانی تێدا سەرکەفتی دبیت.”
بەربژێرێ هەژمارە 3 ل سەر لیستا 275 یا پارتی دیموکراتی کوردستان، پەیامەکا گەرم و نەتەوەیی ئاراستەی خەلکێ دەڤەرێ کر و داخواز ژێ کرن کو ب مەبەستا پاراستنا دەستکەفتان و زامنکرنا داهاتویەکێ گەش، دەنگێ خو بدەنە لیستا (275) یا پارتی.