عەباس فایز، سەرکردە لە ئیتیلافی چوارچێوەی هەماهەنگی و سەرۆکی هاوپەیمانی “تەسیم”، ڕۆژی دووشەممە، جەختی کردەوە کە یەکلاکردنەوەی کاندیدی کۆتایی بۆ سەرۆکایەتی حکومەتی داهاتوو دوای پەسەندکردنی ئەنجامی هەڵبژاردنە پەرلەمانییەکان دەبێت، لە کاتێکدا سەرچاوەیەکی ئاگادار ئاماژەی بەوەدا کە سوککردنی مەرجەکانی پێشوو کە چوارچێوەی هەماهەنگی وەک پێوەرێک بۆ هەڵبژاردنی سەرۆک وەزیران دایاننابوو، دەرگای بۆ هێزە سیاسییەکان کردووەتەوە بۆ پێشکەشکردنی کاندیدەکانیان.
فایز، بە ئاژانسی شەفەق نیوزی ڕاگەیاند: “ڕاگەیاندنی کاندیدی کۆتایی بۆ سەرۆکایەتی حکومەت دوای پەسەندکردنی ئەنجامی هەڵبژاردنەکان لەلایەن دەسەڵاتی دادوەرییەوە دەبێت، و هەر کەسێک مەرجەکانی دیاریکراوی چوارچێوەی هەماهەنگی تێدا بێت، مافی خۆیەتی خۆی کاندید بکات و کێبڕکێ لەسەر پۆستەکە بکات.”
لەبارەی کاندیدکردنی نووری مالیکی، ئەمینداری گشتی حزبی دەعوەی ئیسلامی، بۆ سەرۆکایەتی حکومەتی نوێ، فایز ڕوونی کردەوە: “هیچ شتێک ڕێگری لە مالیکی ناکات کە خۆی بۆ پۆستەکە کاندید بکات، و لەوانەیە کاندیدێکی دیکەش لە شوێنی ئەو پاڵپێوە بنێت بۆ بردنەوەی پۆستەکە، چاوەڕێی ئەوەین بزانین لیژنەی پەیوەندیدار بە تاوتوێکردنی ژیاننامەی کاندیدەکان چی پێشکەش دەکات.”
لەلایەکی دیکەوە، سەرچاوەیەک لە چوارچێوەی هەماهەنگی ئاماژەی بەوەدا کە “سوککردنی سنووردارکردنی کاندیدبوون بۆ پۆستی سەرۆکایەتی حکومەت دەرگای بۆ زۆربەی هێزەکانی چوارچێوەی هەماهەنگی کردووەتەوە بۆ پێشکەشکردنی کاندیدەکانیان بۆ پۆستەکە.”
سەرچاوەکە بە ئاژانسی شەفەق نیوزی وت، “مەرجەکانی پێشوو بریتی بوون لە (نابێت کاندیدەکە پێشتر بۆ پۆستەکە کاندید کرابێت یان پێشتر کاری تێدا کردبێت، و حزبی یان کوتلەی سەربەخۆی نەبێت)، بەڵام هێزەکانی چوارچێوەی هەماهەنگی ڕێککەوتن لەسەر ئەوەی سەرۆک وەزیرانی داهاتوو هیچ کەیس یان داواکارییەکی دادوەری یان گومانی گەندەڵیی لەسەر نەبێت، و ئەگەر کەیسی لەسەر بێت ئەوا ڕەت دەکرێتەوە و ڕێگەی پێنادرێت خۆی بۆ پۆستەکە کاندید بکات.”
سەرچاوەکە جەختی کردەوە کە “کێبڕکێی سەرەکی هێشتا لە نێوان سەرۆکی حکومەتی کاربەڕێکەر، محەمەد شیاع سوودانی، و سەرۆکی ئیئتیلافی دەوڵەتی یاسا، نووری مالیکی، و سەرۆکی دەزگای هەواڵگری، حەمید شەیتری، هەروەها کەسانی دیکەشدا چڕ بووەتەوە.”
چوارچێوەی هەماهەنگی، هەفتەی ڕابردوو، ڕایگەیاند کە دوو لیژنەیان پێکهێناوە، یەکەمیان تایبەتە بە پێکهێنانی حکومەت و پێکهاتووە لە عەممار حەکیم، هەمام حەموودی و عەبدولسادە ئەلفریجی، لە کاتێکدا لیژنەی دووەم تایبەتە بە گفتوگۆکردن لەگەڵ لایەنە سیاسییەکان و پێکهاتووە لە نووری مالیکی، هادی عامری، فالح فەیاز و موحسین مەندەلاوی.