ئەمڕۆ چوارشەممە، 28-1-2026، د. عەلی دیفاعی، گوتەبێژی فەرمی ئەنجوومەنی باڵای ئیسلامیی عێراق لە ڕاگەیەندراوێکدا گوتی: دیاریکردنی سەرۆک وەزیران بابەتێکی دەستووریی عێراقییە و بەپێی حوکمەکانی دەستوور و میکانیزمەکانی پرۆسەی سیاسی ئەنجام دەدرێت، بەجۆرێک کە خزمەت بە سەقامگیری بکات و سەروەری و بەرژەوەندیی باڵای نیشتمانی بپارێزێت.
ئێمە لەکاتێکدا جەخت لە پەرۆشیمان دەکەینەوە بۆ بنیاتنانی پەیوەندیی هاوسەنگ و ئەرێنی لەگەڵ کۆمەڵگەی نێودەوڵەتی کە لەسەر بنەمای ڕێزی دوولایەنە و دەستوەرنەدان لە کاروباری ناوخۆیی بێت، جەخت دەکەینەوە کە عێراق دەوڵەتی دامەزراوەی چەسپاوە و توانای بەڕێوەبردنی ئیستیحقاقە دەستووری و سیاسییەکانی هەیە بە ئیرادەیەکی نیشتمانیی سەربەخۆ، بەجۆرێک گوزارشت لە بژاردەی نوێنەرانی گەلی عێراق بکات.”