وەزارەتی دەرەوەی عێراق ڕوونکردنەوەیەکی بەپەلەی سەبارەت بە لێدوانەکانی ئەم دواییەی فوئاد حوسێن، وەزیری دەرەوە بڵاوکردەوە و تێیدا بوونی هۆشداریی ئەمریکای بۆ سەپاندنی سزا بەسەر عێراقدا پشتڕاستکردەوە، ئەگەر بێت و “کوتلەی گەورە” سوور بێت لەسەر کاندیدەکەی بۆ پۆستی سەرۆک وەزیران.
هەڕەشەی سزا و مەرجی پێکهێنانی حکومەت
وەزارەتی دەرەوە لە بەیاننامەیەکدا ئاماژەی بەوە کرد، ئەو نامە زارەکییەی کە لە واشنتۆنەوە ئاراستەی عێراق کراوە، دوو تەوەرەی سەرەکی لەخۆدەگرێت:
- 1. سزای دارایی و سیاسی: ئاماژەیەکی ڕوون و ڕاشکاو بۆ ئەگەری سەپاندنی سزای نێودەوڵەتی بەسەر کۆمەڵێک کەسایەتی و دامەزراوەی عێراقیدا.
- 2. پێوەرەکانی هاوکاری: دیاریکردنی کۆمەڵێک مەرج و پێوەر بۆ بەردەوامیی کارکردنی هاوبەش لەگەڵ ویلایەتە یەکگرتووەکانی ئەمریکا، بەتایبەتی لە پرسی شێوازی پێکهێنان و کارنامەی حکومەتی داهاتوودا.
لێڵبوونی میدیایی
ڕوونکردنەوەکەی وەزارەت دوای ئەوە هات کە لە هەندێک میدیادا وا بڵاوکرایەوە کە وەزیری دەرەوە بوونی هەڕەشەی سزاکانی ڕەتکردووەتەوە. وەزارەتەکە دەڵێت: “وەزیر لە چاوپێکەوتنە تەلەفزیۆنییەکەیدا جەختی لەسەر بڕگەی دووەم (پێوەرەکانی هاوکاری) کردووەتەوە، نەک بڕگەی یەکەم کە تایبەت بووە بە سزاکان، ئەمەش بووەتە هۆی دروستبوونی لێ تێگەیشتن لە ڕووماڵە میدیاییەکاندا.”
ئەم پێشهاتە لە کاتێکدایە کە گفتوگۆکان بۆ پێکهێنانی حکومەتی نوێ گەیشتوونەتە قۆناغێکی هەستیار و لایەنە سیاسییەکان لەژێر فشاری ناوخۆیی و نێودەوڵەتیدان بۆ یەکلاکردنەوەی کاندیدی سەرۆکایەتی وەزیران.