ئیسماعیل بەقایی، گوتەبێژی وەزارەتی دەرەوەی ئێران، لە تۆڕی کۆمەڵایەتیی ئێکس کاردانەوەی بەرانبەر بە لێدوانەکانی “مایک هاکەبی”، باڵیۆزی ئەمریکا لە ئیسرائیل نیشان دا و بە “قسەی زیادەڕۆ و مەبەستدار” وەسفی کردن.
بەقایی نووسیویەتی: قسەکانی باڵیۆزی ئەمریکا بەڵگەی بەشداریی کارای ئەمریکایە لە جەنگە فراوانخوازییەکانی ئیسرائیل و کۆمەڵکوژی لە فەڵەستین. گوتەبێژی وەزارەتی دەرەوەی ئێران ئاماژەی بەوەش داوە کە کۆماری ئیسلامیی ئێران، هاودەنگ لەگەڵ ڕێکخراوی هاریکاریی ئیسلامی، ئیدانەی ئەم لێدوانانە دەکات، چونکە هاندەرن بۆ بەردەوامیی کوشتاری فەڵەستینییەکان و هێرشکردنە سەر وڵاتانی دیکە.
ئەمە لە کاتێکدایە مایک هاکەبی ڕایگەیاندبوو، کێشە نییە ئەگەر ئیسرائیل دەست بەسەر هەموو ناوچەکەدا بگرێت.