سوپای ئیسرائیل ڕایگەیاند کە هێزە ئاسمانییەکانیان زنجیرەیەک هێرشیان کردووەتە سەر شەش فڕۆکەخانەی سەربازیی سەرەکی لە ناوخۆی ئێران و چەندین ئامانجی ستراتیژییان پێکاوە.
بەپێی ڕاگەیەندراوەکەی سوپای ئیسرائیل، لەم هێرشە ئاسمانییانەدا زیان بە چەندین کەرەستەی سەربازیی ئێرانی گەیشتووە، لە نێویاندا فڕۆکەکانی سەر بە فەیلەقی قودسی سوپای پاسداران و ژمارەیەک هێلیکۆپتەری جەنگی. هەروەها ئاماژە بەوەش کراوە کە ڕێڕەوی فڕینی فڕۆکەکان، سیستەمەکانی ڕادار و بەرگریی ئاسمانیی ئێران کراونەتە ئامانج، کە بە مەبەستی بەرپەرچدانەوەی فڕۆکەکانی ئیسرائیل لە ناوچەکەدا جێگیر کرابوون.
لە بەشێکی تری هەواڵەکەدا هاتووە، لایەنی ئیسرائیلی دەڵێت ئەو فڕۆکەخانانەی کراونەتە ئامانج، پێشتر لەلایەن ئێرانەوە بەکارهێنراون بۆ گواستنەوەی چەک و هاوکاریی دارایی بۆ ئەو گروپە چەکدارانەی کە لە ڕۆژهەڵاتی ناوەڕاستدا نزیکن لە تارانەوە، لەوانەش حیزبوڵڵای لوبنانی، بزووتنەوەی حەماس و حووسییەکانی یەمەن.