تێدرۆس ئەدهانۆم گێبرێیسوس، بەڕێوەبەری گشتیی ڕێکخراوی تەندروستیی جیهانی، ستایشی ئەو کارمەندە تەندروستییە چاکبووانەی بۆ ئازایەتییەکەیان کرد.
بەرپرسانی تەندروستی لە کۆماری دیموکراتیی کۆنگۆ، چاکبوونەوەی چوار تووشبووی ئیبۆلایان پیرۆز کرد.
ئەوان لە یەکەمین کەسانەن لەم شەپۆلە نوێیەی بڵاوبوونەوەی نەخۆشییەکەدا چاک بوونەتەوە و نەخۆشخانەیان جێ هێشتووە.
لە مەراسیمێکدا لە بونیا، بە ئامادەبوونی تێدرۆس ئەدهانۆم گێبرێیسوس، بەڕێوەبەری گشتیی ڕێکخراوی تەندروستیی جیهانی، ستایشی کارمەندە تەندروستییە چاکبووەکان بۆ ئازایەتییەکەیان کرا.
تێدرۆس گوتی، ڕزگاربووەکان ئەوەیان سەلماند بڵاوبوونەوەی نەخۆشییەکە دەوەستێنرێت.
بەرپرسانی کۆنگۆش جەختیان کردەوە ئەو چاکبووانە نیشانیان دا چۆن دەستنیشانکردن و چارەسەری پێشوەختە دەتوانێت هەلی ڕزگاربوون زیاد بکات.
لە هەمان کاتدا، لە بەڕازیل، بەرپرسان دەڵێن خەریکی لێکۆڵینەوەن لە دووەم حاڵەتی گوماناوی بە ئیبۆلا.
لە ئەگەری پشتڕاستکردنەوەدا، حاڵەتەکانی ڕیۆدیژانێرۆ و ویلایەتی ساوپاولۆ دەبنە یەکەمین حاڵەتەکانی دەرەوەی ئەفریقا لە کاتی بڵاوبوونەوەی ئەمدواییەی نەخۆشییەکەدا.