لە ئانوساتی بەڕێوەچوونی کۆبوونەوەی گرووپی حەوت لە شاری ئێڤیانی فەڕەنسا، هەزاران کەس لە شاری جنێڤی سویسرا ڕژانە سەر شەقامەکان و ناڕەزایەتییان بەرانبەر سیاسەتی وڵاتە پیشەسازییە گەورەکان دەربڕی. پۆلیس ڕایگەیاند نزیکەی ٢٠ هەزار کەس لەم خۆپێشاندانەدا بەشدار بوون.
سەرکردەکانی ئەڵمانیا، فەڕەنسا، بریتانیا، ئیتاڵیا، کەنەدا، ژاپۆن و ویلایەتە یەکگرتووەکانی ئەمریکا بڕیارە ڕۆژی دووشەممە کۆ ببنەوە. هاوپەیمانیی “نەخێر بۆ گرووپی حەوت” کە ئەم ناڕەزایەتییەی ڕێک خستبوو، ڕایگەیاند ئەم گرووپە یانەیەکی تایبەتە و بڕیارەکانی تەنها بەرژەوەندیی کەمینەیەکی دەوڵەمەند دەپارێزێت و گوێ بە کێشەکانی وەک گۆڕانی کەشوهەوا و هەژاری نادات.
خۆپێشاندەران دروشمیان دژی فاشیزم و ئیمپریالیزم بەرز کردبووەوە و پلاکاردیان دژی دۆناڵد ترەمپ، سەرۆکی ویلایەتە یەکگرتووەکانی ئەمریکا بەدەستەوە بوو. وتەبێژی هاوپەیمانییەکە گوتی سیاسەتەکانی ترەمپ و سەرکردەکانی دیکەی گرووپی حەوت جیهانی بەرەو شەڕ بردووە.
هەرچەندە سەرەتای خۆپێشاندانەکە هێمنانە بوو، بەڵام دواتر گرووپێکی دەمامکدار توندوتیژییان نواند و زیانیان بە دوکان، ئۆتۆمبێل و وێستگەکانی پاس گەیاند. پۆلیس بۆ بڵاوەپێکردنی خۆپێشاندەران گازی فرمێسکڕێژی بەکار هێنا و فەرمانی کۆتاییهێنان بە گردبوونەوەکەی دا. بەهۆی ئەوەی لە ساڵی ٢٠٠٣دا خۆپێشاندانی هاوشێوە زیانی ٦ ملیۆن فرانکی بە جنێڤ گەیاندبوو، ئەمساڵ پۆلیس ڕێکاری توندی گرتە بەر و دوکاندارەکان ویترینەکانی خۆیان بە تەختە داپۆشیبوو بۆ ئەوەی لە توندوتیژی بپارێزرێن.