ڕۆژی سێشەممە ڕێکخراوی “دەوڵەتی ئیسلامی” (داعش) بەرپرسیارێتی خۆی لەو هێرشە ڕاگەیاند کە ڕۆژی دووشەممە کرایە سەر سەربازگەیەکی سەر بە وەزارەتی ناوخۆی سووریا لە شاری ڕەققە، کە تێیدا کارمەندێکی ئەمنی کوژرا.
وەزارەتی ناوخۆی سووریا ڕایگەیاند، هێزەکانیان توانیویانە هێرشی دوو چەکداری داعش بۆ سەر بارەگای فەرماندەیی هێزەکانی ئاسایشی ناوخۆ لە ڕەققە پووچەڵ بکەنەوە، بەڵام لە کاتی ڕووبەڕووبوونەوەکەدا یەکێک لە کارمەندەکانی وەزارەتەکە گیانی لەدەستداوە.
لە لایەکی دیکەوە و لە ڕووداوێکی جیادا، کۆمپانیای پەیوەندییەکانی سووریا ڕایگەیاند کە کێبڵێکی نێودەوڵەتی دەریایی کە شاری “تەرتووس”ی سووریا بە “ئەسکەندەرییە”ی میسرەوە دەبەستێتەوە، ڕووبەڕووی کردەوەیەکی تێکدەرانە بووەتەوە. ئەمەش بووەتە هۆی پچڕان و لاوازبوونی خزمەتگوزاری ئینتەرنێت لە سەرانسەری سووریادا.
کۆمپانیاکە بە ئاژانسی هەواڵی فەرمی سووریا (سانا)ی ڕاگەیاندووە، چاککردنەوەی کێبڵەکە و گەڕانەوەی خزمەتگوزارییەکان کاتی دەوێت. هەروەها ئاماژەی بەوەش کردووە کە ئەم هێرشە ناتوانرێت لەو “هەڵمەتە سیستماتیکە” جیابکرێتەوە کە ژێرخانی سووریا دەکاتە ئامانج.
France24