سەرۆكی هەرێمی كوردستان پلەی ژمارەیەك ئەفسەری وەزارەتی پێشمەرگە بەرزدەكاتەوە‌

ئەمڕۆ چوارشەممە 2024/2/7، نێچیرڤان بارزانی، سەرۆكی هەرێمی كوردستان، لە ڕێوڕەسمێكدا كە لە سەرۆكایەتیی هەرێمی كوردستان بەڕێوە چوو، پلەی نوێی پێنج ئەفسەری باڵای وەزارەتی پێشمەرگەی بۆ بەستن پاش ئەوەی فەرمانی بەرزكردنەوەی پلەكانیانی واژۆ كرد و بۆ لیوا ڕوكن و لیوا بەرزكرانەوە.

لە وتەیەكدا سەرۆكی هەرێمی كوردستان پیرۆزبایی لێكردن و هیوای سەركەوتنی بۆ خواستن، هەروەها جەختی لە گرنگی و پێویستیی سەرخستنی پرۆسەی چاكسازی و یەكخستنەوەی پێشمەرگە لە چوارچێوەی وەزارەتی پێشمەرگەدا كردەوە.
نێچیرڤان بارزانی دووپاتی كردەوە كە ناوی پێشمەرگە ناوێكی پیرۆزە و پێویستە وابەستەیی و ئینتیمای یەكەمی پێشمەرگە بۆ خاك و نیشمان و گەلەكەی بێت و هەڵنانی هەنگاوی خێرا و جددی بۆ یەكخستنەوەی پێشمەرگە بە پێویست زانی، هەموو پشتگیرییەكیشی بۆ ئەو پرۆسەیە دەربڕی.
لای خۆیانەوە پلەدارانی وەزارەتی پێشمەرگە، سوپاس و پێزانینان بۆ نێچیرڤان بارزانی و گرنگیدانیان بە پێشمەرگە دەربڕی و بەڵێنی پێشمەرگانەی دڵسۆزی و خزمەتی نیشتمانیان دووپات كردەوە.