zagros news agency

فوئاد حوسێن : كێشەی مووچەی مانگی حەوت چارەسەربوو

وەزیری دەرەوەی عێراق ئاماژەی بۆ ئەوە كرد، كێشەی مووچەی مانگی حەوتی مووچەخۆرانی هەرێمی كوردستان چارەسەر بووە و مانگی هەشتیش بەمنزیكانە چارەسەر دەبێت و دابەش دەكرێت.

ئەمشەو یەكشەممە لە ماڵی د. شاخەوان عەبدوڵا لە بەغدا، سەرۆك كۆمار و وەزیری دەرەوەی عێراق و بەشێك لە وەزیر و سەرۆكی فڕاكسیۆنە كوردستانییەكان كۆبوونەوە.

كۆبوونەوەكە تایبەت بوو بۆ تاوتوێكردنی كێشە و گرفتە تایبەتەكانی بەردەم پرسی مووچە و بودجەی هەرێمی كوردستان لەنێوان هەرێم و بەغدا.

دوای كۆبوونەوەكە، فوئاد حوسێن وەزیری دەرەوەی عێراق لە كۆنگرەیەكی رۆژنامەوانیدا گوتی: لە كۆبوونەوەكەدا كێشەكانی نێوان هەرێمی كوردستان و حكوومەتی فیدڕالی لەبارەی مووچە تاوتوێ كران، هەروەها چارەسەركردن و بەردەوامی دابەشكردنی مووچەی مانگەكانی حەوت و هەشت و مانگەكانی داهاتوو تا كۆتایی ساڵ خرانەبەرباس.

گوتیشی: لە كۆبوونەوەكەدا بڕیاردرا سەرجەم وەزیر و پەرلەمانتاران لەسەرجەم فڕاكسیۆنەكان بەیەكەوە كار بكەن بۆ چارەسەركردنی پرسی مووچە و نەهێشتنی گرفت و بەربەستەكان لەگەڵ وەزارەتی دارایی عێراق.

فوئاد حوسێن هەروەها گوتی: كێشەی مووچەی مانگی حەوتی مووچەخۆرانی هەرێمی كوردستان چارەسەر بووە و لەمڕۆژانە دابەش دەكرێت، بۆ مووچەی مانگی هەشتیش هەوڵ دەدەین لە چەند رۆژی كەمی داهاتوودا گرفتەكان چارەسەر بێت و ئەویش دابەش بكرێت.

وەزیری دەرەوەی عێراق جەختیشی كردەوە كە هەوڵ دەدرێت كێشە تەكنیكی و هونەرییەكانی دابەشكردنی مووچە لەنێوان وەزارەتی دارایی هەرێم و وەزارەتی دارایی حكوومەتی فیدڕال چارەسەر بكرێت، ئەگەر ئەو كێشانە چارەسەر بوون كە چارەسەریش دەبێـت، ئەوا دابەشكردنی مووچە بەگوێرەی یاسای بودجە بەردەوام دەبێت.

هەواڵی پەیوەندیدار

وەزارەتی دەرەوەی ئەمەریکا: واشنتن ئاگربەستی نێوان هەسەدە و تورکیای بۆ کۆتایی هەفتە درێژ كرده‌وه‌

سەڵاح

کەشناسی: تاوە باران و بروسکە لە ناوچە جیاجیاکانی هەرێم هەیە

سەڵاح

سەرۆکی هەرێمی کوردستان سەرەخۆشی لە سوپای ئەمریکا و بەریتانیا دەکات

یاسین