ڕۆژنامەی ئەپۆلای پۆرتوگالی ئاشکرایکردووە کە کریستیانۆ ڕۆناڵدۆی ئەستێرەی پورتوگالیی یانەی نەسڕ دوای تەواوبوونی پشووەکەی و بەشداریکردنی لە مۆندیالی ٢٠٢٦ بەرنامەیەکی تایبەتیی لەشجوانی بۆ وەرزی نوێ دەستپێکردووە.
بەپێی ئەم سەرچاوانە ستافی ڕاهێنەرایەتیی یانە سعوودییەکە بە سەرکردایەتیی ئەنجی پۆستیکۆگلۆی ڕاهێنەری ئوسترالی پلانێکیان داناوە بۆ بەڕێوەبردنی خولەکەکانی یاریکردنی ئەم ئەستێرە تەمەن ٤١ ساڵە بە جۆرێک کە لە هەندێک یاریدا نەوەد خولەکی تەواو یاری نەکات تاوەکو ڕێگری لە ماندووبوونی جەستەیی بکرێت.
لە لایەکی دیکەوە ڕۆناڵدۆ لە ئێستادا هیچ نیازێکی بۆ وازهێنان لە یاریکردن چ لەسەر ئاستی یانەکان یان لەگەڵ هەڵبژاردەی پورتوگال نییە و بە تەواوی بەردەوامە لە پاراستنی بەرنامە چڕەکانی ڕاهێنان لە پێناو مانەوەی لە لوتکەی ئامادەییدا بۆ ڕووبەڕووبوونەوەی ئاستەنگەکانی ئەم وەرزە.