دۆناڵد ترەمپ، سەرۆکی ویلایەتە یەکگرتووەکانی ئەمریکا، هۆشداری دایە یەکێتیی ئەورووپا سەبارەت بە هەوڵەکانی بۆ پێدانی پێگەی “ئەندامی هاوبەش” بە کەنەدا و ڕایگەیاند؛ ئەگەر ئەم هەنگاوە وەک هەوڵێکی دوژمنکارانە لێکبدرێتەوە، ئەوا باجی گومرگی قورس بەسەر ئەورووپادا دەسەپێنێت یاخود لە چەندین بواردا بازرگانی لەگەڵ کیشوەرەکەدا ڕادەگرێت.
لە لێدوانێکیدا بۆ ڕۆژنامەنووسان لە ویلایەتی کارۆلاینای باکوور، ترەمپ پڕۆژەکەی یەکێتیی ئەورووپای بە کارێکی “پێکەنیناوی” وەسف کرد و بە توندی ڕەخنەی لە پێگەی بازرگانیی کەنەدا گرت و گوتی:
«کەنەدا بووەتە هاوبەشێکی بازرگانیی زۆر خراپ. پێموایە ئەگەر ئەو کارە بکەن و منیش بە هەنگاوێکی دوژمنکارانەی بزانم، باجی گومرگی زۆر قورس بەسەر ئەورووپادا دەسەپێنم، یان لە زۆر بواردا بازرگانی ڕادەگرم».
ئەم کاردانەوە توندەی سەرۆکی ئەمریکا دوای ئەوە دێت کە ئورسولا ڤۆن دێر لایەن، سەرۆکی کۆمیسیۆنی یەکێتیی ئەورووپا، لە دانیشتنێکدا بە ئامادەبوونی مارک کارنی، سەرۆکوەزیرانی کەنەدا، ئاشکرای کردبوو کە یەکێتییەکە بە نیازە ڕێگە خۆش بکات بۆ ئەوەی کەنەدا ببێتە یەکەمین وڵات کە پێگەی “ئەندامی هاوبەش” لە یەکێتیی ئەورووپادا بەدەستبهێنێت.