ویلایەتە یەکگرتووەکانی ئەمریکا بە بەکارهێنانی مافی ڤیتۆی خۆی لە ئەنجوومەنی ئاسایش، پەسەندکردنی پڕۆژەبڕیارێکی ڕاگرت تیایدا داوای ئاگربەستی دەستبەجێ لەنێوان ئیسرائیل و حەماس کرابوو. ئەم پڕۆژەبڕیارە بەمەبەستی دابینکردنی گەیشتنی بێ بەربەستی هاوکارییە مرۆییەکان بۆ ناوچە فەلەستینییەکان ئامادەکرابوو.
١٤ ئەندامەکەی دیکەی ئەنجوومەنی ئاسایش دەنگی ئەرێنییان بە پڕۆژەبڕیارەکە دا، بەڵام دژایەتیی ئەمریکا ڕێگربوو لە پەسەندکردنی. لیندە تۆماس-گرینفیڵد، نوێنەری ئەمریکا لە نەتەوە یەکگرتووەکان، ڕایگەیاند وڵاتەکەی پشتگیریی هیچ هەنگاوێک ناکات ئاماژە بە ئیدانەکردنی حەماس و چەکداماڵین و پاشەکشێی نەکات.
لەم نێوەندەدا، ناوەندەکانی دابەشکردنی هاوکارییە مرۆییەکانی سەر بە ڕێکخراوی GHF، کە بە پشتیوانیی ئەمریکا لە غەززە کاردەکەن، بڕیارە ئەمڕۆ جارێکی دیکە دەرگاکانیان بەڕووی خەڵکدا بکەنەوە. ئەم ناوەندانە دوێنێ بەهۆی نیگەرانییە ئەمنییەکانەوە داخرابوون. پێشتر هەندێک ڕاپۆرت سەبارەت بە تەقەکردنی کوشندە لە فەلەستینییەکان لە نزیک ئەم ناوەندانە بڵاوکرابوونەوە.