بە نزیکبوونەوە لە هەڵبژاردنی پێشوەختەی سەرۆکایەتیی کۆماری ئێران کە بڕیارە ڕۆژی هەینی ٢٨ی حوزەیران لەو وڵاتە بەڕێوە بچێت، محەمەد مەحموودیان، سەرکونسوڵی ئێران لە سلێمانی لە کۆنفرانسێکی ڕۆژنامەوانیدا ڕایگەیاند، سندووقی جێگیر و گەڕۆک بۆ هاووڵاتییانی ئێرانیی گەشتیار، یان دانیشتووی پارێزگاکانی سلێمانی، هەڵەبجە و کەرکووک دانراوە و دەتوانن هاوکات لەگەڵ ناوخۆی وڵاتەکەیان لە هەڵبژاردنەکەدا بەشداری بکەن و دەنگ بدەن.
مەحموودیان گوتی: خۆشحاڵم بە هاووڵاتییانی ئێرانیی گەشتیار، یان دانیشتووی هەرێمی کوردستان ڕابگەیەنم، دەرفەتی بەشداریی ئەو ئازیزانە لەو هەڵبژاردنە چارەنووسسازەدا دابین کراوە و هاوکات لەگەڵ بەڕێوەچوونی پرۆسەی هەڵبژاردن لە نێوخۆی وڵات ئێرانیانی دانیشتووی پارێزگاکانی سلێمانی، هەڵەبجە و کەرکووکیش دەتوانن لەم هەڵبژاردنەدا بەشداری بکەن.
سەر کۆنسۆلی ئێران لە سلێمانی گوتی: هاووڵاتیانی ئێرانی دەتوانن لە کاتژمێر 08:30ی بەیانی تا 05:00ی ئێوارە سەردانی سەرکونسوڵخانەی سلێمانی بکەن و دەنگی خۆیان بخەنە ناو سندووقە جێگیرەکانی ناو کونسوڵخانەوە. هەروەها ژمارەیەک سندووقی گەڕۆکیش لە شارەکانی هەڵەبجە و کەلار و کەرکووک بۆ وەرگرتنی دەنگی هاووڵاتییانی ئێرانی لەو شوێنانە دەبێت.
هەواڵی پێشوو