رۆژنامەی جروزالم پۆستی ئیسرائیلی نووسیویەتی: محەمەد شیاع سوودانی لە زۆر بواردا لەگەڵ چوارچێوەی هەماهەنگی ناکۆکە. جروزالم پۆست بڵاوی کردووەتەوە لەبەر ئەمە گروپه شیعەکانی عێراق دەیانهەوێت لە ڕێگەی هەڵبژاردنی پێشوەختە دووری بخەنەوە.
لە ڕاپۆرتی ئەم رۆژنامە ئیسرائیلییەدا باس لەوە کراوە، چوارچێوەی هەماهەنگی لە هەڵکشانی پێگەی جەماوەریی محەمەد شیاع سوودانی نیگەرانە و هەوڵی لەکەدارکردنی کارەکانی دەدەن.
ئێستا لایەنە شیعەکانی عێراق ترسیان هەیە سوودانی لە هەڵبژاردنی داهاتووی پەرلەمان لیستی هەبێت و ببێتە ژمارەیەکی گەورە.
باسی لەوەشکردووە، چوارچێوەی هەماهەنگی دەیانەوێت بەبێ دروستکردنی کێشە و ئاژاوە، لەرێگەی دروستکردنی کێشەی سیاسی و ئابوورییەوە محەمەد شیاع سوودانی لەپۆستی سەرۆک وەزیران دووربخەنەوە.
سەبارەت بە هۆکاری سەرەکیی ناکۆکییەکانی سوودانی و چوارچێوەی هەماهەنگی، ئەو رۆژنامەیە ئەوەیخستووەتەڕوو، سودانی بە سیاستەکانی بانکی فیدراڵی ئەمریکا بۆ پێشگرتن بە قاچاخی دۆلار ڕازی بووە و ئەمەش هێزە شیعەکانی نیگەران کردووە.