کۆشکی سپی پشتگیریی ئیسرائیل لە دواخستنی ئازادکردنی زیندانیانی فەلەستینی دەکات

کۆشکی سپی ڕایگەیاند پشتگیری لە بڕیاری ئیسرائیل دەکات بۆ دواخستنی ئازادکردنی ٦٠٠ زیندانی فەلەستینی، ئەمەش بەهۆی “ڕەفتاری دڕندانە”ی بزووتنەوەی حەماس لەگەڵ بارمتە ئیسرائیلییەکان.
بەپێی ڕاپۆرتێک لە تایمز ئۆف ئیسرائیل، برایان هیوز، گوتەبێژی ئەنجوومەنی ئاسایشی نەتەوەیی ئەمریکا، ڕایگەیاندووە “بەهۆی ڕەفتاری دڕندانەی حەماس لەگەڵ بارمتان و نمایشکردنی سامناکی تابووتی منداڵانی خێزانی بیباس لە شەقامی غەزە، بڕیاری ئیسرائیل بۆ دواخستنی ئازادکردنی زیندانیان هەنگاوێکی گونجاوە.”
هیوز هەروەها ڕایگەیاند سەرۆک کۆماری ئەمریکا “ئامادەیە بەرانبەر بە حەماس پشتگیری لە هەموو بڕیارێکی ئیسرائیل بکات.”
ئەم هەڵوێستەی ئەمریکا لە کاتێکدایە، بنیامین نەتانیاهۆ، سەرۆک وەزیرانی ئیسرائیل، ڕۆژی یەکشەممە ڕایگەیاند: ئیسرائیل ئازادکردنی ئەو ٦٠٢ زیندانییە دوا دەخات تا ئەو کاتەی دڵنیایی لە حەماس وەردەگرێت کە کۆتایی بە “ڕێوڕەسمە سووکایەتی پێکەرەکانی” دەهێنێت لە کاتی ڕادەستکردنەوەی بارمتە ئیسرائیلییەکان. بڕیار بوو زیندانییەکان ڕۆژی شەممەی ڕابردوو ئازاد بکرێن.