١٨ ڕێکخراوی کۆمەڵگای مەدەنیی کوردی لە ڕۆژئاوای کوردستان لە بەیاننامەیەکی هاوبەشدا بەهۆی بانگهێشت نەکردنی نوێنەرانی کورد بۆ کۆنگرەی دیالۆگی نیشتمانیی سووریا ڕەخنەی توند لە حکوومەتی ئەم وڵاتە دەگرن.
ڕێکخراوەکان نامەیەکیان ئاراستەی سەرۆکی حکوومەتی کاتیی سووریا، ئەحمەد شەرع، کردووە و ڕایانگەیاندووە، بانگهێشتنەکردنی لایەنە سیاسییەکانی کوردی بۆ کۆنگرەی نیشتمانیی سووریا بە مەبەستە و ژمارەی ئەو کەسایەتییانەی بۆ کۆنگرەکە بانگهێشت کراون، نوێنەرایەتیی تەواوی ڕای کوردانی سووریا ناکەن.
ڕێکخراوەکان ڕەخنەیان لە ڕێبەریی حکوومەتی کاتیی سووریا گرت و ڕایانگەیاند، کۆمەڵگای مەدەنیی کوردی بە هەموو ڕێکخستن، تایبەتمەندی و پێکهاتەکانییەوە بە مەبەست پشتگوێ خراوە و ھیچ پەیوەندییەک بە ھیچ لایەنێکی کوردییەوە نەکراوە.
بە گوتەی ئەم ڕێکخراوانە، کارنامەی دانوستانەکانی نیشتمانیی سووریا کە کار لەسەر کۆمەڵگای مەدەنی لە قۆناغی سووریای نوێدا دەکات، بە تەواوی پشتگوێ خراون.
ئەم ڕێکخراوانە لە بەیاننامەکەیاندا باسیان لە ڕۆڵ و گرنگیی بەشداریکردنی کورد لە کۆنگرەکەدا کردووە و ڕایانگەیاندووە، کورد ھەرگیز نەیویستووە سووریا پارچە بکات و ھەمیشە فاکتەری ئارامی و پشتگیریی یەکپارچەیی خاکی ئەم وڵاتە بووە.
هەواڵی پێشوو