میدیا ناوخۆییەکانی سووریا بڵاویان کردەوە کە دەسەڵاتدارانی تورکیا ژمارەیەک هاووڵاتیی سوورییان ئازاد کردووە کە پێشتر لە شارەکانی سەرێ کانی (ڕەئسولعەین) و گرێ سپی (تەل ئەبیەز) دەستگیر کرابوون.
بەگوێرەی سەرچاوە خۆجێیەکان، ئەو هاووڵاتییانە لە کۆتاییی ساڵی 2019 و لە میانەی ئۆپەراسیۆنێکی سەربازیی تایبەتدا لەلایەن هێزەکانی تورکیاوە لە ناوچەکانی سەرێ کانی و گرێ سپی بە چەندین تۆمەتی جیاواز دەستگیر کرابوون.
ئەو کەسە ئازادکراوانە، پاش ئازادکردنیان دەستبەجێ لە ڕێگەی دەروازەیەکی سنوورییەوە گواستراونەتەوە بۆ پارێزگای ئیدلب لە باکووری ڕۆژئاوای سووریا. تا ئێستا ژمارەی وردی کەسە ئازادکراوەکان ئاشکرا نەکراوە.
شایەنی باسە، دوای ئەوەی تورکیا و گرووپە چەکدارە هاوپەیمانەکانی لە ساڵی 2019 دەستیان بەسەر شارەکانی سەرێ کانی و گرێ سپیدا گرت، چەکدارانی سەر بە تورکیا دەستیان بە دەستگیرکردنی بەرفراوانی هاووڵاتییانی سیڤیل کرد. تا ئێستا بە سەدان هاووڵاتی لەو دوو ناوچەیە بە تۆمەتی جیاواز، لەوانە هەبوونی پەیوەندی لەگەڵ بەڕێوەبەرایەتیی خۆسەر، دەستگیر کراون. بەپێی زانیارییەکان، هەندێک لەو دەستگیرکراوانە سزای قورسی وەک زیندانیی هەتاهەتاییان بەسەردا سەپێنراوە و چارەنووسی ژمارەیەکی بەرچاوی دیکەشیان هێشتا نادیارە.
