ڕووسیا بۆ یەکەمجار پشتڕاستی کردەوە، هێزە سەربازییەکانی کۆریای باکوور لە شەڕی دژی هێزەکانی ئۆکرانیا لە ناوچەی کورسک بەشدارییان کردووە.
وەزارەتی دەرەوەی ڕووسیا، بە ئاماژەدان بە پەیماننامەی هاوبەشیی ستراتیژیی نێوان هەردوو وڵات، پشتیوانی لە “بەشداریی بەرچاو”ی سەربازانی کۆریای باکوور لە شەڕەکەدا کرد و ڕایگەیاند: ئەم هێزانە شانبەشانی سوپای ڕووسیا جەنگاون.
ژەنەراڵ ڤالێری گێراسیمۆڤ، سەرۆکی ئەرکانی گشتیی سوپای ڕووسیا، لە ڕاپۆرتێکدا بۆ ڤلادیمیر پوتین، سەرۆکی ڕووسیا، ڕایگەیاندووە، سەربازانی کۆریای باکوور ڕۆڵێکی گرنگیان لە “ڕزگارکردنی” کورسکدا گێڕاوە. ئەم لێدوانانە پشتڕاستکردنەوەی ئەو ڕاپۆرتانەی پێشووی ئۆکرانیا و بەرپرسانی ڕۆژئاوایە کە باس لە ناردنی هەزاران سەربازی کۆریای باکوور بۆ بەرەکانی شەڕ دەکەن.
پێشتر ئۆکرانیا لە چوارچێوەی هێرشە پێچەوانەکانی خۆیدا، بەشێک لە هەرێمی کورسکی ڕووسیای گرتبووە دەست.
ڕووسیا بانگەشەی ئەوە دەکات، توانیویەتی زۆربەی ناوچەی کورسک لە هێزەکانی ئۆکرانیا وەربگرێتەوە، بەڵام کیێڤ دەڵێت هێزەکانیان هێشتا لە ناوچەکەدا بەرگری دەکەن.
بەرپرسانی ئەمریکاش ڕایانگەیاندووە، زیاتر لە ١١ هەزار سەربازی کۆریای باکوور لەم شەڕەدا بەشدارییان کردووە و زیانێکی گیانیی زۆریان بەرکەوتووە. هاوکات، ڕاپۆرتان باس لە ناردنی سێ هەزار سەربازی دیکە لەلایەن پیۆنگیانگەوە بۆ ڕووسیا و ناردنی چەک و تەقەمەنی وەک مووشەکی کورت مەودا و مووشەکهاوێژ دەکەن.
شیکاران هۆشداری دەدەن، ڕووسیا لە بواری دابینکردنی چەک و هێزی مرۆییدا، زیاتر و زیاتر پشت بە کۆریای باکوور دەبەستێت. ئەم ڕەوتە نیگەرانییە نێودەوڵەتییەکانی سەبارەت بە ئەگەری ئاڵوگۆڕی تەکنەلۆژیای سەربازی لەنێوان ئەم دوو وڵاتەدا زیاتر کردووە.
