دوای چوار ڕۆژ لە هەڵگیرسانی، ئاگرە گەورەکەی لەنگەرگەی شەهید ڕەجایی لە شاری بەندەرعەباسی ئێران کۆنترۆڵ کرا. بەپێی ئامارە فەرمییەکان، لەم ڕووداوە کارەساتبارەدا ٧٠ کەس گیانیان لەدەست داوە و دەیانی دیکەش بێسەروشوێنن یان تەرمەکانیان نەناسراونەتەوە. هەرچەندە هۆکاری سەرەکیی تەقینەوەکە هێشتا بە فەرمی ڕانەگەیەندراوە، بەرپرسانی ئێران ئاماژە بە هاوردەکردنی کاڵای مەترسیدار بە ناوی کاڵای ئاسایی دەکەن، لە کاتێکدا هەندێک سەرچاوەی دیکە باس لە بوونی ماددەی پێویست بۆ دروستکردنی مووشەک دەکەن.
وەزارەتی ناوخۆی ئێران کۆتاییهاتنی ئۆپەراسیۆنی کوژاندنەوەی ئاگری ڕاگەیاند، بەڵام گوتەبێژی ڕێکخراوی بەڕێوەبردنی قەیرانەکانی ئێران دەڵێت دامرکاندنەوەی یەکجارەکیی ئاگرەکە ١٥ بۆ ٢٠ ڕۆژی دیکەی پێویستە.
هاوکات، بەڕێوەبەری قەیرانەکانی پارێزگای هۆرمزگان ئاماری قوربانییەکانی پشتڕاست کردەوە و ڕایگەیاند کە ٧٠ کەس گیانیان لەدەست داوە، ٢٢ کەس بێسەروشوێنن و تەرمی ٢٢ کەسی دیکەش بەهۆی سووتانی زۆرەوە نەناسراونەتەوە.
سەبارەت بە هۆکاری ڕووداوەکە، هەرچەندە لێکۆڵینەوەی فەرمی هێشتا ئەنجامەکەی بڵاو نەکراوەتەوە، مورتەزا مەحموودی، ئەندامی شاندی پەرلەمانی ئێران بۆ شوێنی ڕووداوەکە، ڕایگەیاند کە “درۆی هاوردەکارێکی کاڵای مەترسیدار و کەمتەرخەمیی بەرپرسانی بەندەرەکە” هۆکاری سەرەکی بوون. ناوبراو ئاماژەی بەوە دا کە هاوردەکارەکە کاڵای مەترسیداری وەک کاڵای ئاسایی لە بەڵگەنامەکاندا تۆمار کردووە. پارێزگاری هۆرمزگانیش پێشتر ئاماژەی بە “زانیاریی ناڕاست” وەک هۆکار کردبوو.
لەلایەکی دیکەوە، ڕۆژنامەی نیویۆرک تایمز لە زاری سەرچاوەیەکی نزیک لە سوپای پاسدارانەوە بڵاوی کردەوە کە ماددە تەقیوەکە “سۆدیۆم پێرکلۆرەیت” بووە، کە یەکێکە لە پێکهاتە سەرەکییەکانی سووتەمەنیی مووشەک و لە چینەوە هاوردە کراوە. بەڵام، ئێحسان موئەزن، بەرپرسێکی هێزی دەریایی سوپای پاسداران، ئەم زانیارییانەی ڕەت کردەوە و جەختی کردەوە کە بەندەری ڕەجایی بەندەرێکی بازرگانییە و هیچ کاڵایەکی سەربازیی تێدا نەبووە و لەوێوە هاوردە نەکراوە.
جێی ئاماژەیە، تەقینەوەکە لە نزیک کۆگاکانی کۆمپانیای پەرەپێدانی خزمەتگوزاریی دەریایی و بەندەریی سینا ڕووی داوە، کە سەر بە دامەزراوەی موستەزعەفانە. سەرۆکی دامەزراوەکە، حسێن دێهقان، ڕایگەیاندووە کە دواتر لێدوان دەدات بەڵام وەزارەتی ڕێگاوبان و شارسازی بەرپرسیارێتیی هەیە. بەڕێوەبەری کۆمپانیای سیناش هەمان هۆکاری “لەقەڵەمدانی کاڵای مەترسیدار وەک کاڵای ئاسایی” خستووەتەڕوو.
لێکۆڵینەوەکان بۆ دەرخستنی هۆکاری وردی ڕووداوەکە و دیاریکردنی بەرپرسیارێتییەکان بەردەوامە.
