لە ١ی ئایاری ٢٠٢٥، کە رۆژی جیهانی کرێکارانە، دەسەڵاتدارانی تورکیا زۆربەی رێگا سەرەکییەکانی شاری ئیستانبوڵیان داخستبۆ بۆ ئەوەی پێش بە کۆبوونەوە و خۆپیشاندانی کرێکاران بگرن.
بەپێی هەواڵی میدیاکانی تورکیا، هەموو ڕێگاکانی بەرەو گۆڕەپانی تەقسیم داخران و رێوشوێنە ئەمنییەکان لە ناوچەکانی تەقسیم، بێشیکتاش و شیشلی بۆ بەرزترین ئاست بەرزکرانەتەوە.
ساڵانە لە رۆژی ١ی ئایار، کرێکاران لە زۆربەی گۆڕەپانەکانی تورکیا بۆ دەربڕینی داواکارییەکانیان و ناڕەزایەتی دژ بە سیاسەتە ئابووری و کۆمەڵایەتییەکانی حکومەت کۆدەبنەوە، بەڵام دەسەڵاتدارانی تورکیا، بەتایبەت لە ئیستانبوڵ، هەوڵ دەدەن ئەم کۆبوونەوانە سنووردار بکەن، چونکە گۆڕەپانی تەقسیم وەک نیوەندێکی سەرەکی بۆ خۆپیشاندانان لە تورکیا ناسراوە. ئەم رێوشوێنانەی ئەمنیش نیگەرانییەکی زۆر لەبارەی ئازادیی ڕادەربڕین و مافی کۆبوونەوە لە تورکیا لێوەکەوتووەتەوە.
