تیدرۆس ئەدهانۆم، بەڕێوەبەری گشتیی ڕێکخراوی تەندروستیی جیهانی (WHO)، لە پەیامێکدا لە تۆڕی کۆمەڵایەتیی ئێکس (تویتەری پێشوو) ڕایگەیاند، زیاتر لە ١٦ ملیۆن کەس لە سەرتاسەری سووریادا پێویستیان بە یارمەتی و پشتیوانیی مرۆیی بەپەلە هەیە.
ئەدهانۆم لە درێژەی پەیامەکەیدا داوای لە وڵاتانی بەخشەر و ڕێکخراوە خێرخوازییەکان کردووە کە ئاستی پشتیوانییەکانیان بۆ سووریا بەرز بکەنەوە، چونکە “ژیانی خەڵک بەستراوەتەوە بەو یارمەتییانەوە”.
ناوبراو هەروەها جەختی لەوە کردووەتەوە کە پێشکەشکردنی خزمەتگوزاریی تەندروستی بە ئاوارە و لێقەوماوانی سووریا لە ئێستادا “پێویستییەکی زۆر گرنگترە لە هەر کاتێکی دیکە”.
ئەم ئامار و داواکارییەی ڕێکخراوی تەندروستیی جیهانی لە کاتێکدایە کە سووریا ساڵانێکی زۆرە بەدەست قەیرانی مرۆیی و شەڕ و ئاڵۆزییەوە دەناڵێنێت، کە بووەتە هۆی ئاوارەبوونی ملیۆنان کەس و تێکچوونی ژێرخانی ئابووری و تەندروستیی وڵاتەکە.
