بەیانیی ئەمڕۆ سێشەممە (١٠ی حوزەیرانی ٢٠٢٥)، ڕووداوێکی تەقەکردن لە قوتابخانەیەکی شاری گراتسی نەمسا ڕوویدا و بەهۆیەوە چەندین کەس کوژران.
پۆلیس و وەزارەتی ناوخۆی نەمسا ڕایانگەیاند، ئەنجامدەری هێرشەکەش لەنێو کوژراوەکاندایە. دوای بیستنی دەنگی تەقە لە دەوروبەری کاتژمێر ١٠:٠٠ی بەیانی، پۆلیس گەیشتە شوێنی ڕووداوەکە و دەستبەجێ ئۆپەراسیۆنێکی بەرفراوانی دەستپێکرد. قوتابخانەکە چۆڵکرا و سەرجەم قوتابی و کارمەندان بۆ شوێنێکی ئارام گواسترانەوە.
هێزە تایبەتەکانی پۆلیس و هێلیکۆپتەر هێشتا لە شوێنی ڕووداوەکەن و داوا لە هاووڵاتیان کراوە لە ناوچەکە دوور بکەونەوە و پابەندی ڕێنماییەکانی هێزە ئەمنییەکان بن. تا ئێستا بەرپرسان هیچ زانیارییەکی وردیان لەبارەی ناسنامە و پاڵنەری هێرشبەرەکە بڵاو نەکردووەتەوە.
گراتس، دووەم گەورەترین شاری نەمسایە و ژمارەی دانیشتووانی نزیکەی ٣٠٠ هەزار کەسە.
هەواڵی پێشوو