لە کاردانەوەی هێرشە ئاسمانییەکانی ئەمریکا بۆ سەر دامەزراوە ئەتۆمییەکانی، وەزارەتی دەرەوەی ئێران داوای سازکردنی کۆبوونەوەیەکی بەپەلەی ئەنجوومەنی ئاسایشی نێودەوڵەتیی کرد.
تاران لە بەیاننامەیەکی فەرمیدا، هێرشەکەی بە “پێشێلکارییەکی ئاشکرا و بێوێنەی بنەما سەرەتاییەکانی جاڕنامەی نەتەوە یەکگرتووەکان و یاسا نێودەوڵەتییەکان” لەقەڵەم دا. هەروەها ڕایگەیاند، حکوومەتی ئەمریکایی بەرپرسیارێتیی تەواوی دەرەنجامە مەترسیدارەکانی ئەم هێرشە لەئەستۆ دەگرێت و پێویستە ئەنجوومەنی ئاسایش لێپرسینەوەی لەگەڵدا بکات.
وەزارەتی دەرەوەی ئێران جەختیشی کردووەتەوە، هێرشەکە پێشێلکردنی ڕاستەوخۆی بڕیارنامەی ٢٢٣١ی ئەنجوومەنی ئاسایشە، کە لە ساڵی ٢٠١٥ بۆ پشتگیریکردن لە ڕێککەوتننامەی ئەتۆمیی نێوان ئێران و وڵاتانی گرووپی ٥+١ دەرکرابوو.
هاوکات، تاران داوای کۆبوونەوەیەکی بەپەلەی ئەنجوومەنی پارێزگارانی ئاژانسی نێودەوڵەتیی وزەی ئەتۆمیشی کردووە. ئەم داواکارییە لە کاتێکدایە کە هەمان ئەنجوومەن لە ١٢ی حوزەیران، بە زۆرینەی دەنگ بڕیارنامەیەکی دژی ئێران پەسەند کرد و ڕایگەیاندبوو، تاران پابەندی پەیماننامەی قەدەغەکردنی بڵاوبوونەوەی چەکی ئەتۆمی نەبووە.
