میدیاکانی ئێران ڕۆژی سێشەممە، ٢١ی تشرینی یەکەم، هەواڵی ئەگەری ئاڵوگۆڕی مەهدییە ئەسفەندیاری، هاووڵاتیی ئێرانیی دەستبەسەرکراو لە فەڕەنسا، لەگەڵ دوو زیندانیی فەڕەنسیی دەستبەسەرکراو لە ئێران ڕاگەیاند، کە ئەمەش ئاماژەیە بۆ نزیکبوونەوە لە چارەسەرکردنی دۆسیەی زیندانییانی نێوان هەردوو وڵات.
وەحید جەلالزادە، جێگری کۆنسوڵی پەرلەمان و کاروباری ئێرانییەکانی وەزارەتی دەرەوەی کۆماری ئیسلامی، لەم بارەیەوە گوتی: “وەزیری دەرەوە ڕایگەیاندووە کە خاتوو ئەسفەندیاری خراوەتە کەناڵی ئاڵوگۆڕەوە و ئێمە پاکێجێکی سیاسی و کۆنسوڵیمان ئامادە کردووە کە هەردوو وڵات دەبێت ئەنجامی بدەن. هیوادارین ئەم ڕووداوە بە زوویی ڕووبدات و ئێمە شایەتی گەڕانەوەی خاتوو ئەسفەندیاری بۆ وڵات بین.”
پێشتر لە ڕۆژی پێنجشەممە، ١١ی ئەیلوول، عەباس عێراقچی، وەزیری دەرەوەی کۆماری ئیسلامی، ڕایگەیاندبوو کە دانوستانەکان بۆ ئاڵوگۆڕی زیندانییانی فەڕەنسی لەگەڵ مەهدییە ئەسفەندیاری، نزیک بوونەتەوە لە قۆناغەکانی کۆتایی و بە زوویی جێبەجێ دەکرێت.
لە ئێستادا دوو هاووڵاتیی فەڕەنسی بە تۆمەتی “سیخوڕی” لە ئێران دەستبەسەرن. سێسیل کۆهلەر، مامۆستا و ئەندامی فیدراسیۆنی پەروەردە و فەرهەنگی سەندیکای هێزی کاری فەڕەنسا و هاوسەرەکەی، ژاک پاریس، کە لە مانگی ئایاری ٢٠٢٢ وەک گەشتیار سەردانی ئێرانیان کردبوو، هاوکات لەگەڵ خۆپیشاندانەکانی ڕۆژی مامۆستا لە ئێران دەستبەسەر کران. کۆماری ئیسلامی دواتر ئەو دووانەی تۆمەتبار کرد کە بە مەبەستی “ئامادەکردنی بارودۆخ بۆ شۆڕش و ڕووخاندنی حکوومەتی ئێران” سەردانی ئەو وڵاتەیان کردووە. دەسەڵاتی دادوەریی کۆماری ئیسلامی بە فەرمی ئەوانی بە “کۆبوونەوە و پیلانگێڕی بە مەبەستی کارکردن دژی ئاسایشی نیشتمانی” تۆمەتبار کرد. ئەم دوو کەسە هەروەها بە “پەیوەندی لەگەڵ موساد” تۆمەتبار کراون. فەڕەنسا دۆسیەیەکی دژی کۆماری ئیسلامی لە دادگای نێودەوڵەتیی دادپەروەری (ICJ) بەهۆی دەستبەسەرکردنی کۆهلەر و پاریسەوە کردووەتەوە.
لە لایەکی دیکەوە، مەهدییە ئەسفەندیاری، هاووڵاتیی ئێرانی لە فەڕەنسا بە تۆمەتی “پەرەپێدانی تیرۆر لە تۆڕە کۆمەڵایەتییەکان” دەستبەسەر کراوە. بڵاوکراوەی لۆپۆێنی فەڕەنسی ڕایگەیاندبوو کە ئەو لە پەیامەکانی تێلێگرامدا پشتگیریی هێرشی ٧ی تشرینی یەکەمی حەماسی بۆ سەر ئیسرائیل کردووە. تۆمەتێک کە کۆماری ئیسلامی بە “نادادپەروەرانە”ی دەزانێت.