ئاژانسی نێودەوڵەتیی وزەی ئەتۆمی دەیەوێت جارێکی تر هاوکاریی تەواوی خۆی لەگەڵ ئێران دەست پێ بکاتەوە. بەپێی ڕاپۆرتی ئاژانسی هەواڵیی ڕۆیتەرز، ڕافایل گرۆسی، بەڕێوەبەری گشتیی ئاژانسەکە، ئامانجی ئەم هەنگاوەی بە دووبارە دەستپێکردنەوەی پشکنینەکانی ئاژانس لە ئێراندا ناوبردووە.
گرۆسی ئەم هەواڵەی لە کاتێکدا ڕاگەیاندووە کە ئەنجوومەنی حوکمڕانانی ئاژانسی وزەی ئەتۆمی ڕۆژی ٢٠ی تشرینی دووەم، بە دەرکردنی بڕیارنامەیەک داوای لە ئێران کرد کە “بێ دواکەوتن” هاوکاریی تەواو و خێرای لەگەڵ ئاژانسەکەدا هەبێت، زانیاریی ورد دەربارەی یەدەگەکانی یۆرانیۆمی دەوڵەمەندکراو بە ئاستی نزیک لە چەکی ئەتۆمی بخاتە بەردەست پشکنەرانی ئاژانسەکە و ڕێگە بدات بە دەستگەیشتن بە سایتە ناوکییەکانی وڵاتەکە.
ڕۆژێک دوای پەسەندکردنی ئەم بڕیارنامەیە لە ئەنجوومەنی حوکمڕاناندا، وەزارەتی دەرەوەی کۆماری ئیسلامیی ئێران لە ڕاگەیاندنێکدا ئەم بڕیارنامەیەی بە “نایاسایی و بێ پاساو” ناوبرد و ڕای گەیاند کە کۆتایی بە لێکتێگەیشتنی ٩ی ئەیلوول لەگەڵ ئاژانسەکە، ناسراو بە “ڕێککەوتنی قاهیرە”، هێناوە.
هەروەها وەزارەتی دەرەوەی فەڕەنسا ڕای گەیاندووە کە وەزیری دەرەوەی ئێران، عێراقچی، ڕۆژی چوارشەممە، ٢٦ی تشرینی دووەم، سەردانی فەڕەنسا دەکات و لەگەڵ وەزیری دەرەوەی فەڕەنسا کۆ دەبێتەوە. ئەم وەزارەتە ئەوەیشی خستە ڕوو کە ئەم دیدارە دەرفەتێک دەبێت بۆ ئەوەی ئێران هان بدرێت بۆ دووبارە دەستپێکردنەوەی هاوکاری لەگەڵ ئاژانسەکەدا.
