هێزە ئەمنییەکانی ئیسرائیل، ڕەنگە پاشماوەی تەرمی یەکێک لە دوایین بارمتە کوژراوەکانی بەدەست حەماسەوە وەرگرتبن. پۆلیسی ئیسرائیل ڕایگەیاند کە تابوتەکە ئێستا بە پاسەوانییەوە دەگوازرێتەوە بۆ سەنتەری نیشتمانیی پزیشکیی دادوەری، بۆ ئەوەی لەوێ ناسنامەی تەرمەکە دیاری بکرێت.
نووسینگەی بنیامین ناتانیاهوو، سەرۆک وەزیرانی ئیسرائیل، بەشێوەیەکی ڕوون باسی لە ڕادەستکردنی بارمتەیەکی کوژراو نەکرد، بەڵام پشتڕاستی کردەوە کە “پاشماوەی دۆزراوە لە کەرتی غەزە” لە ڕێگەی خاچی سوورەوە وەرگیراون. دواتر نوێنەرێکی گرووپی حەماسیش لە چاوپێکەوتنێکدا لەگەڵ ئاژانسی ڕۆیتەرز، هەواڵی ڕادەستکردنی پاشماوەی تەرمەکەی ڕاگەیاند.
ئەگەر پشتڕاست بکرێتەوە کە ئەم پاشماوەیە هی یەکێکە لەو دوو بارمتە کوژراوەی کە هێشتا ڕادەست نەکراون، ئەوا تەنها یەک بارمتەی کوژراو لە دەست حەماسدا لە غەزەدا دەمێنێتەوە. دوو قوربانییە کوژراوەکە بریتین لە ئەفسەرێکی پۆلیسی ئیسرائیلیی تەمەن ٢٤ ساڵ، بە ناوی ڕان گڤیلی، و کرێکارێکی کشتوکاڵیی تایلەندیی تەمەن ٤٣ ساڵ، بە ناوی سودتیساک ڕینتلاک. هەردووکیان لە هێرشی ڕێکخراوی ئیسلامیی فەلەستینیی حەماس بۆ سەر ئیسرائیل لە ٧ی تشرینی یەکەمی ٢٠٢٣ کوژران و تەرمەکانیان بۆ کەرتی غەزە گوازرانەوە. خاچی سوور وەک نێوەندگیرێک لە پرۆسەی ڕادەستکردنەوەکەدا کاری کردووە.
پێشتریش، ٢٦ تەرم لە کۆی ٢٨ تەرمی بارمتە کوژراوەکان، بەشێوەیەکی قۆناغ بە قۆناغ ڕادەست کراونەتەوە. هەندێک سەرچاوە ئاماژە بەوە دەکەن کە حەماس بۆ ئەم ڕادەستکردنەوەیە بەیاننامەیەکی فەرمیی بڵاو نەکردۆتەوە. ڕاپۆرتەکان دەڵێن پاشماوەکە لە بێت لاهیا، لە باکووری غەزە دۆزراوەتەوە.
هەواڵی پێشوو