ئەنتۆنی بلینكن وەزیری دەرەوەی ئەمەریكا لە كۆنگرەیەكی رۆژنامەوانیدا رایگەیاند: دڵخۆشین ئەمڕۆ لە ئەمەریكا پێشوازیمان لە محەمەد شیاع سوودانی سەرۆك وەزیرانی عێراق و شاندی یاوەری كرد.
راشیگەیاند: لەگەڵ سەرۆك وەزیرانی عێراق ئەمڕۆ كۆبوونەوەیەكی باش و گرینگمان ئەنجامداوە، هەروەها لەگەڵ عێراق لە زۆر ڕووەوە هاوبەشیمان هەیە و چاویشمان لەوەیە ئەو هاوبەشییەی نێوانمان زیاتر پەرەی پێ بدەین.
وەزیری دەرەوەی ئەمەریكا هەر لەو كۆنگرە رۆژنامەوانییەدا باسی لە هێرشەكەی چەند رۆژی رابردووی ئێرانی بۆ سەر ئیسڕائیل كرد و لەمبارەیەوە گوتی: ئەمەریكا پابەندە بە بەرگریكردن لە ئیسڕائیل، لە هەمانكاتیشدا هەموو هەوڵێك دەدەین ئاڵۆزییەكان بە رێگەی دبلۆماسی چارەسەر بكەن بۆ ئەوەی گرژییەكان فراوانتر نەبن.
ئەنتۆنی بلینكن جەختیشی كردەوە كە ئەمەریكا بەهیچ شێوەیەك نایەوێ گرژی و ئاڵۆزییەكان لە رۆژهەڵاتی ناوەڕاست زیاتر پەرە بستێنێ.