سەرۆککۆماری ئێران لە دیدارێکدا لەگەڵ سێ چالاکوانی مەدەنی سەبارەت بە پرسی ئەتۆمی ڕایگەیاند: “بەپێی بیروباوەڕ و فتوای ڕێبەریی ئێران، وڵاتەکەمان بە هیچ شێوەیەک بەدوای چەکی ئەتۆمییەوە نییە و ئامادەین ئەوە بسەلمێنین و ڕێگە بە ئاژانسی نێودەوڵەتیی وزەی ئەتۆمی بدەین پشکنین بۆ دامەزراوەکانمان بکات.”
مەسعوود پزیشکیان سەبارەت بە پیتاندنی یۆرانیۆم و زانستی ئەتۆمی گوتی: “بۆ کەرتی تەندروستی، کشتوکاڵ و بابەتەکانی دیکە پێویستمان بە زانستی ئەتۆمی هەیە و دەستبەرداری نابین.”
سەرۆککۆماری ئێران گوتیشی: “ئێمە چەندین جار ڕامانگەیاندووە کە لێدوانی من گرنگ نییە، بەڵکوو فتوا و سیاسەتی ڕێبەری باڵا لە ڕووی بیروباوەڕەوە گرنگە. بە هیچ شێوەیەک بەدوای دروستکردنی چەکی ئەتۆمییەوە نین. بە هەر شێوەیەک دەخوازن دەتوانن بێن و پشکنین بۆ دامەزراوەکانمان بکەن، بەڵام ئەگەر نەتوانین لە زانستەکەمان بۆ چارەسەری نەخۆشییەکان، پیشەسازی یان کشتوکاڵ کەڵک وەربگرین، قبووڵی ناکەین.”
ناوبراو ئاماژەی بەوەش دا: “هیوادارین جیهان و ئەمەریکاش ئەوە بزانن و ئەو پڕوپاگەندانە قبووڵ نەکەن کە گوایە ئێمە دەمانەوێت چەکی ئەتۆمی دروست بکەین. دیارە ئەوان دەیانەوێت ئەم بابەتە بسەپێنن، بەڵام ئەم هەوڵەیان لەگەڵ بیروباوەڕی ئێمە زۆر جیاوازە.”
