وەزیری وزەی تورکیا گوتوویەتی گرێبەستی درێژخایەنی هاوردەکردنی گازی سروشتیی ئەم وڵاتە لە ئێرانەوە لە مانگەکانی داهاتوودا کۆتایی دێت و لەوانەیە هەردوو لا سەبارەت بە درێژکردنەوەی گفتوگۆ بکەن، هەرچەندە هێشتا هیچ دانوستانێک دەستی پێ نەکردووە.
گرێبەستی ئێستا ماوەکەی لە مانگی تەممووزدا بەسەر دەچێت، گواستنەوەی ساڵانەی ٩.٦ ملیار مەتر سێجا گاز لەخۆ دەگرێت، بەڵام لە کرداردا بڕی ڕادەستکراو زۆربەی کات کەمتر بووە.
ئالپ ئەرسەلان بایرەکتار لە پەراوێزی کۆبوونەوەیەکی دیپلۆماتیک لە ئەنتاڵیادا گوتی: “بەپێی پێشبینییەکانمان، لەوانەیە بۆ ئاسایشی دابینکردنی وزەی تورکیا پێویستیمان بەم بۆڕیی گازە یان لێشاوی گاز لە ئێرانەوە هەبێت. لە ئێستادا هیچ دانوستانێک لە ئارادا نییە، چونکە وا دیارە لایەنی بەرانبەر سەرقاڵی کێشەی دیکەیە، بەڵام لەوانەیە لە داهاتوودا سەبارەت بە درێژکردنەوەی ئەگەریی گرێبەستەکە گفتوگۆ بکەین.”
وەزیری وزەی تورکیا هەروەها گوتی تورکیا بەدوای هەمەچەشنکردنی سەرچاوەکانی دابینکردنی گازی سروشتیی خۆیەوەیە، لەوانە لە ڕێگەی کڕینی گازی شلی ڕووسیاوە.