یووڤال شتاینیتز، سەرۆکی کۆمپانیای ڕافایلی حکوومەتی بۆ پیشەسازییە بەرگرییە پێشکەوتووەکانی ئیسرائیل، لە کۆنفرانسێکدا تیشکی خستە سەر تواناکانی سیستەمی بەرگریی وڵاتەکەی. ناوبراو لەو کۆنفرانسەدا کە لە لایەن “ناوەندی ئورشەلیم بۆ ئاسایش و کاروباری دەرەوە” ڕێک خرابوو، ڕای گەیاند: لە کاتی هێرشی گرووپی حەماس بۆ سەر ئیسرائیل لە ئۆکتۆبەری ٢٠٢٣ـەوە، حەماس لە غەززە و گرووپی حیزبوڵڵا لە لوبنان بە گشتی نزیکەی ٤٠ هەزار مووشەکیان ئاراستەی ئیسرائیل کردووە.
شتاینیتز ئاشکرای کرد: قوبەی ئاسنین زۆربەی ئەو مووشەکانەی تێک شکاندووە و ڕێژەی سەرکەوتنەکە هەرچەندە ١٠٠ لەسەد نەبووە، بەڵام زۆر لەو ڕێژەیە نزیک بووە و گەیشتووەتە ٩٨ تا ٩٩ لەسەد؛ کەواتە هەرچەندە سیستەمەکە بێ کەموکوڕی نییە، بەڵام نزیکەی بەو شێوەیە کار دەکات. ناوبراو ئاماژەی بەوەش دا کۆماری ئیسلامی لە ساڵی ٢٠٢٤ و لە دوو خولی پێکداداندا، نزیکەی ١٥٠٠ مووشەکی بالیستیکی ئاراستەی ئیسرائیل کردووە و تەنیا چەند دە دانەیەک تێک نەشکێندراون. شتاینیتز جەختیشی کردەوە کە هیچ کێشەیەکی کەمیی مووشەکی تێکشکێنەریان نەبووە.
