چالاکوانانی لایەنگری فەلەستین دەڵێن هێزەکانی ئیسرائیل کاروانێکی دەریایییان لە ئاوە نێودەوڵەتییەکانی ڕۆژئاوای قوبرس ڕاگرتووە.
ئەم کاروانە لە زیاتر لە ٥٠ بەلەم پێکهاتووە و هاوکاریی مرۆییی بۆ غەززە هەڵگرتووە. هاوپەیمانیی “کەشتیگەلی ئازادی” ڕایگەیاند هێزەکانی ئیسرائیل لە دووریی ٤٦٠ کیلۆمەتر لە غەززەوە چوونەتە سەر بەلەمەکان. ئەم گرووپە کردەوەکەی ئیسرائیلی بە دەستدرێژییەکی نایاسایی لە ئاوە کراوەکاندا ناو برد.
بنیامین نەتانیاهۆ، سەرۆکوەزیرانی ئیسرائیل، گوتی ئەم ئۆپەراسیۆنە پیلانێکی تێکدەرانەی بۆ شکاندنی گەمارۆی سەر تێرۆریستانی حەماس لە غەززە پووچەڵ کردەوە.
مانگی ڕابردووش هێزەکانی ئیسرائیل ٢٢ بەلەمی هەمان کاروانیان لە نزیک دوورگەی کریتی یۆنان دەستبەسەر کردبوو. لەو ڕووداوەدا ١٨١ چالاکوان دەستگیر کران. ٥٤ بەلەمی ئەم کاروانە ڕۆژی پێنجشەممەی ڕابردوو لە بەندەری مارماریسی تورکیاوە بەرەو غەززە بەڕێ کەوتبوون.