ئاڵۆزییە سەربازییەکانی ڕۆژهەڵاتی ناوەڕاست پێیان ناوەتە قۆناغێکی مەترسیدارەوە، دوای ئەوەی بە فڕۆکەی بێفڕۆکەوان (درۆن) هێرش کرایە سەر دامەزراوەکانی وزە لە ناوخۆی سعودیە. لەو باریەوە، فەرماندەیی ناوەندیی هێزەکانی ئەمریکا (سێنتکۆم) ڕایگەیاند کە سوپای پاسدارانی ئێران لە ماوەی ٧٢ کاتژمێری ڕابردوودا زیاتر لە ٣٠ هێرشی ئاسمانیی ڕاستەوخۆی ئاراستەی هێزەکانی ئەمریکا و ژێرخانی سعودیە کردووە.
بەرەبەیانی ڕۆژی چوارشەممە، “سێنتکۆم” ئاشکرای کرد کە فڕۆکە جەنگییەکانی ئەمریکا و سعودیە هێرشی وردیان کردووەتە سەر چەندین کۆگای چەک و ناوەندی لۆجیستی لە ڕۆژهەڵاتی عێراق، کە بە وتەی ئەوان سەر بەو گرووپانەی نزیک لە ئێرانن کە بەرپرسیارن لەو هێرشانە.
لە بەرامبەردا، دەستەی حەشدی شەعبی ڕایگەیاند لە ئاکامی ئەو هێرشە هاوبەشەی ئەمریکا و سعودیە بۆ سەر بارەگا فەرمییەکانیان لە چەند پارێزگایەکی عێراق، بەپێی ئامارێکی سەرەتایی، لانی کەم ٢٠ ئەندامیان کوژراون و ٣٢ی دیکەشیان بریندار بوون.
بەپێی سەرچاوەیەکی حکومی بۆ ئاژانسی “شەفەق نیوز”، ئەم پەرەسەندنانە بوونەتە هۆی ئەوەی عەلی فاڵح ئەلزەیدی، سەرۆک وەزیرانی عێراق سەردانە بڕیارلێدراوەکەی بۆ سعودیە هەڵبوەشێنێتەوە.
لە هەڵوێستێکی پەیوەندیداردا، مقتدا سەدر، ڕێبەری ڕەوتی نیشتمانیی شیعه، داوای لە سوپای پاسدارانی ئێران و گرووپە چەکدارەکان کرد عێراق نەگلێننە ناو ململانێ ناوچەیییەکانەوە، هەروەها داوای لە حکومەت کرد سەروەریی دەوڵەت و ئاسایش بچەسپێنێت.
ئەم لێدانانەی ناوخۆی عێراق هاوکات بوون لەگەڵ ئاڵۆزیی نوێی نێوان ئێران و ئەمریکا، دوای ئەوەی تاران چەند مووشەکێکی بالیستیی ئاراستەی بنکەیەکی سەربازیی هێزەکانی ئەمریکا لە ئوردن کرد، بەڵام فەرماندەیی ئەمریکا ڕایگەیاند کە مووشەکەکانیان بەرپەرچ داوەتەوە و هیچ زیانێکی گیانی و مادییان لێ نەکەوتووەتەوە.