راگەیاندنی وەزارەتی پەروەردەی هەرێمی کوردستان دەستپێکی گۆڕانکارییەکی بەرفراوان لە پرۆگرامەکانی خوێندن بۆ ساڵی نوێی خوێندن ڕادەگەیەنێت، کە تێیدا ١١٠ پەرتووک نوێ کراونەتەوە. لەم چوارچێوەیەدا، پاکێجێکی نوێ و تایبەت بۆ باخچەی ساوایان پێک هاتوو لە پێنج پەرتووک بە ناونیشانەکانی خێزان، نیشتمان، هاووڵاتیبوون، ژینگەدۆستی و ڕێزگرتن و سوپاسگوزاری داندراوە، بۆ ئەوەی لە قۆناغی سەرەتای گەشەکردنی منداڵاندا هۆشیاری پەروەردەییان لێ دروست ببێت.
لە قۆناغی سەرەتایی و ناوەندیدا، گۆڕانکارییەکی بەرچاو لە زۆرینەی بابەتەکاندا ئەنجام دراوە؛ لەوانە گۆڕینی پەرتووکەکانی کوردی و زانستی پۆلی شەشەم و گشت وانەکانی تری پۆلی یەکەم تا شەشەم (جگە لە زمانی ئینگلیزی کە بۆ ساڵی داهاتوو دواکەوتووە)، هەروەها زیادکردنی پەرتووکی پەروەردەی هونەری کە بوارەکانی شانۆ، میۆزیک و سینەما بۆ پۆلەکانی حەوتەم، هەشتەم و نۆیەم لەخۆ دەگرێت. هاوکات لە قۆناغی ئامادەییشدا، گۆڕانکاری لە پرۆگرامەکانی بیرکاری بۆ پۆلەکانی دە و یازدەی وێژەیی و کیمیا بۆ پۆلەکانی دە و یازدەی زانستیدا کراوە.
سەرباری ئەم هەموو گۆڕانکاری و نوێکردنەوە فراوانانە لە سەرجەم قۆناغەکانی خوێندن، وەزارەتی پەروەردە جەخت لەوە دەکاتەوە کە هیچ گۆڕانکاری و دەستکارییەک لە پرۆگرامی خوێندنی پۆلی ١٢ی ئامادەییدا نەهاتووە و وەک خۆی دەمێنێتەوە، بە مەبەستی پاراستنی سەقامگیری و دڵنیایی زیاتر بۆ قوتابییان لەم قۆناغە هەستیارەی خوێندندا.