لیوا مەنسوور عەلی سوڵتان، یاریدەدەری بریکاری وەزارەتی ناوخۆی عێراق بۆ ڕێکخستنی چەک، ئاشکرای کرد، پرۆسەی تۆمارکردنی چەکی هاووڵاتییان وەک بتەمایەکی بنەڕەتی و پردێکی پەیوەندی بەهێز بۆ دروستکردنی متمانە لە نێوان شەقام و دەزگاکانی جێبەجێکردنی یاسادا ئەژمار دەکرێت.
تاوەکو ئێستا زیاتر لە 500 هەزار هاووڵاتیی عێراقی لە چوارچێوەی کارەکانی کۆمیسیۆنی نیشتمانیی بەردەوامدا چەکەکانیان تۆمار کردووە.
بۆ کارئاسانی لەم پرۆسەیەدا و بۆ دوورکەوتنەوە لە ڕۆتین، وەزارەتی ناوخۆ پشتی بە سەکۆی ئەلیکترۆنیی (Ur) بەستووە.
لە سەرانسەری پارێزگاکاندا 845 نوسینگەی تایبەتمەند بە تۆمارکردنی چەک کراونەتەوە، کە بە شێوەیەکی بەخۆڕایی و بێ بەرامبەر ئەرکی پشکنین و تۆمارکردنی چەکەکان لە ئەستۆ دەگرن.
هەروەها ئاماژە بەوە کراوە، لە سەرەتای ئەمساڵەوە ڕێژەیەکی بەرچاوی هاووڵاتیان بۆ تۆمارکردنی چەکەکانیان سەردانی نووسینگەکانیان کردووە و پشتیوانیان لەم هەوڵە نیشتمانییە کردووە.
لە بەشێکی دیکەی قسەکانیدا لیوا مەنسوور ڕوونی کردەوە، دیوەخانی هۆزە عێراقییەکان بوونەتە یەکێک لە شوێنە سەرەکی و دەروازە گرنگەکان بۆ سەرکەوتنی هەڵمەتەکە، بەجۆرێک زیاتر لە 600 شێخی هۆز دیوەخانەکانیان کردۆتەوە و بە فەرمی داوایان لە ئەندامانی هۆزەکانیان کردووە چەکەکانیان تۆمار بکەن.
هەروەها لە ناو ئەم دیوەخانانەدا زنجیرەیەک کۆڕ و کۆبوونەوە لەبارەی ڕەتکردنەوەی توندوتیژی و ڕووبەڕووبوونەوەی ئەو نەریتە عەشایەرییانە بەستراون کە زیان بە ئاسایش دەگەیەنن، لە پێشەنگیان دا دیاردەی “دەقەی عەشائێری” بۆ پاراستنی ئاشتی کۆمەڵایەتی.