وەزیری گەنجینەی ئەمریکا ئاشکرای دەکات کە وڵاتەکەی لە کەمترین ماوەی ڕابردوودا لە لێواری واژۆکردنی ڕێککەوتنێکدایە لەگەڵ کۆماری ئیسلامی ئێران، ئەمەش بە مەبەستی کۆتاییهێنان بە قەیرانی گەرووی هورمز و دابینکردنی ئاسایشی ڕێڕەوە ئاوییەکان.
سکۆت بێسێنت، وەزیری گەنجینەی ئەمریکا، لە چاوپێکەوتنێکی ڕاستەوخۆدا لەگەڵ تۆڕی “CNBC” ڕایگەیاند: “ئەگەری زۆرە ئەمڕۆ یان سبەی چوارشەممە، ئەمریکا و ئێران بگەنە ڕێککەوتنێکی کۆتایی بۆ دووبارە کردنەوەی گەرووی هورمز بەڕووی کەشتیوانی نێودەوڵەتیدا.”
بێسێنت ئاماژەی بەوەش کرد کە ئامانجی سەرەکی واشنتۆن لەم ڕێککەوتنە، گەرەنتییکردنی ئازادیی تەواوی هاتوچۆی کەشتییە بازرگانییەکانە، بە شێوەیەک کە بەبێ پێدانی هیچ جۆرە باج، سەرانە یان ڕەسمێکی گومرکی بە لایەنی ئێرانی، بتوانن بە گەرووەکەدا تێپەڕن.
وەزیری گەنجینە ئەوەشی خستەڕوو کە هێشتا ڕێککەوتنەکە بە فەرمی ڕانەگەیەندراوە، بەڵام ئاماژەکانی ئاساییبوونەوە لە ناوچەکە دەرکەوتوون و لە ئێستاوە ژمارەیەکی زۆر لە کەشتییە بارھەڵگرەکان دەستیان بە هاتنە دەرەوە لە گەرووی هورمز کردووە.
دەستبەجێ دوای بڵاوبوونەوەی ئەم لێدوانە ئەرێنییە، نرخی نەوتی خاو و وزە لە بازاڕەکانی جیهاندا دابەزینێکی بەرچاویان بەخۆیانەوە بینی، ئەمەش دوای ماوەیەک لە بەرزبوونەوەی نرخەکان بەهۆی گرژییەکانی ناوچەکەوە.