سێشەممە، دەستەی دەروازە سنوورییەکان شەش راسپاردەی فەرمیی دەرکرد، دیارترینیان کارکردنە بە درێژایی 24 کاتژمێر لە دەروازەکان و رێگریکردنە لە تێکەڵبوونی دەسەڵاتەکان لەنێوان دامەزراوە پەیوەندیدارەکاندا.
دەستەکە لە راگەیەندراوێکدا ئاشکرایکرد، سێشەممە نۆیەمین کۆبوونەوەی ئەنجوومەنی دەستەکە بۆ ساڵی 2026 بە سەرۆکایەتی عومەر عەدنان وائیلی، سەرۆکی ئەنجوومەن و بە ئامادەبوونی نوێنەری دامەزراوە کاراکان لە دەروازە سنوورییەکان و نوێنەری پارێزگاکان بەڕێوەچوو. لە کۆبوونەوەکەدا ژمارەیەک دۆسیەی ستراتیژی تایبەت بە بەڕێوەبردن و پەرەپێدانی دەروازە سنوورییەکان، میکانیزمی بەرزکردنەوەی ئاستی کاری دامەزراوەیی و پتەوکردنی هەماهەنگی لەنێوان لایەنەکاندا تاوتوێ کرا، ئەمەش بە مەبەستی کۆنترۆڵکردنی دەروازەکان، سەقامگیریی ئەمنی و مسۆگەرکردنی سەروەریی نیشتمانی.
ئەنجوومەنەکە ژمارەیەک بابەتی دیکەی خستە سەر خشتەی کارەکانی، کە پەیوەستن بە پەرەپێدانی رێکارەکانی کارکردن، چاودێری و وردبینیکردن، پتەوکردنی ئاڵوگۆڕی زانیاری و یەکخستنی داتا لەنێوان دامەزراوە پەیوەندیدارەکان. لە پاڵ ئەمانەدا، بەدواداچوون بۆ ئەو رێکارانە کرا کە رێگری لە هەر حاڵەتێکی دەستکاریکردن، قاچاخچێتی و بەفیڕۆدانی سامانی گشتی دەکەن و ژینگەی کارکردن لە دەروازە سنوورییەکان باشتر دەکەن.
دەستەکە ئەو شەش راسپاردەیەی لە کۆبوونەوەکەدا پەسەند کراون، بەم شێوەیەی خوارەوە خستە روو:
یەکەم: کارکردن لە سەرجەم دەروازە سنوورییەکان بە درێژایی 24 کاتژمێر، بە مەبەستی ئاسانکاری بۆ هاتنی گەشتیاران و کاڵاکان لەگەڵ جەختکردنەوە لەسەر ئەنجامدانی پشکنینی ورد.
دووەم: وەرگرتنی سەرجەم داواکارییەکانی یەکێتی ژوورە بازرگانییەکان و بانگهێشتکردنی نوێنەرێکیان بۆ ئەنجوومەن بە مەبەستی تاوتوێکردنی داواکارییەکان، بەبێ ئەوەی نوێنەرەکە ئەندامێکی هەمیشەیی ئەنجوومەن بێت.
سێیەم: پشتیوانیکردنی کارمەندانی دەستەی گشتیی گومرک لە ئەنجامدانی پشکنین و کەشفکردنی کاڵا هاوردە و هەناردەکراوەکان، لەگەڵ پابەندکردنی سەرجەم دامەزراوە کاراکان بە رێگریکردن لە تێکەڵبوونی دەسەڵاتەکان و کارکردن لە چوارچێوەی تایبەتی هەر لایەنێک بەپێی یاسا و رێنماییەکان، بەجۆرێک پێشێلی کاری گومرک نەکات.
چوارەم: ئاراستەکردنی سەرجەم فڕۆکەخانەکان بۆ پابەندبوونی تەواو بە یاسای دەستەی دەروازە سنوورییەکان ژمارە 30ـی ساڵی 2016، بەوپێیەی دەستەکە لایەنێکی چاودێر و سەرپەرشتیاری کاری سەرجەم دامەزراوەکانە، هەروەها ئاراستەکردنی بەڕێوەبەرایەتی فڕۆکەخانەکان بەوەی دەست لە کاروباری دەستەی گشتیی گومرک وەرنەدەن.
پێنجەم: ئاراستەکردنی دەستەی گشتیی گومرک بە چاککردنەوەی سەرجەم ئامێرەکانی سۆنار کە لە دەروازە سنوورییەکان لەکار کەوتوون، بەهۆی گرنگییان لە پشکنینی کاڵاکاندا.
شەشەم: ئامادەبوونی کارمەندانی گومرک لە ژووری کۆنترۆڵکردنی کێشە کانتەرەکان لە بەندەرە دەریاییەکان، بە مەبەستی دڵنیابوون لە وردیی کێشی بارەکان، چونکە ئەوان لایەنی هونەریی تایبەتمەندن بۆ هەژمارکردنی باج و دڵنیابوون لە دروستیی خوێندنەوەکانیان.
وائیلی جەختیکردەوە لە گرنگیی بەردەوامبوون لە پەیڕەوکردنی شێوازە مۆدێرنەکان لە بەڕێوەبردنی دەروازەکان و یەکخستنی هەوڵەکان لەنێوان سەرجەم دامەزراوەکاندا، بەجۆرێک لەگەڵ ئاراستەکانی حکوومەتدا بگونجێت بۆ بەرزکردنەوەی توانای دەروازە سنوورییەکان و ئاستی خزمەتگوزارییەکان بۆ گەشتیاران و بازرگانان، لەگەڵ پاراستنی ئابووریی نیشتمانی و زیادکردنی داهاتە نانەوتییەکان.
سەرۆکی ئەنجوومەن پێداگریشی کرد لەسەر پێویستیی بەدواداچوون بۆ جێبەجێکردنی راسپاردە و بڕیارە دەرکراوەکان و مسۆگەرکردنی وەرگێڕانیان بۆ رێکاری کردەیی لەسەر زەوی، کە ئەمەش هەوڵەکانی حکوومەت بۆ کۆنترۆڵکردنی دەروازە سنوورییەکان، پەرەپێدانی میکانیزمی کارکردن و بەرزکردنەوەی ئاستی داهاتە نانەوتییەکان بەهێز دەکات.