زیادکردنی دانەوێڵەی تەواو بۆ نێو بەرنامەی خۆراکی دەکرێت زۆر بەسادەیی لە ڕێگەی تێکەڵکردنی کووپێک گەنمی فارۆ لەگەڵ زەڵاتە، خواردنی کاسەیەک شۆفان لە بەیانیاندا یان دانانی بڕێک کینوا لە تەنیشت ماسیی سالموون ئەنجام بدرێت.
سەلمێنراوە ژەمە کەم‌کاربۆهیدراتەکان یارمەتیی دابەزاندنی کێش و باشترکردنی تەندروستیی گشتی دەدەن و بێ سنووردارکردنی توند، کالۆریی بەکارهاتوو کەم دەکەنەوە؛ لە هەمان کاتدا ئەم بابەتە جێی مشتومڕە.
هەندێک لە پزیشکان دەڵێن ئەم جۆرە بەرنامە خۆراکییانە مرۆڤ بەرەو خواردنی لەڕادەبەدەری پرۆتین و خۆراکی چەور دەبەن و دیدێکی نەرێنی بەرانبەر کاربۆهیدرات دروست دەکەن. لە بەرانبەردا، پسپۆڕانی دیکە دووپاتی دەکەنەوە بەکارهێنانی دروستی ئەم بەرنامەیە دەتوانێت ئاستی شەکری خوێن ڕێک بخات و کۆلسترۆڵی باش زیاد بکات.
بە پێی کلینیکی کلیڤلاند، مرۆڤ دەتوانێت ڕۆژانە ۱۰۰ تا ۱۵۰ گرام کاربۆهیدرات لە ژەمە کەم‌کاربۆهیدراتەکاندا بخوات، چونکە جەستە پێویستی بەم ماددە خۆراکییە سەرەکییە هەیە.
کارۆلین سوزی، پسپۆڕی خۆراک گوتی: «کاتێک لە بەرنامەیەکی خۆراکیی بەرتەسککەرەوەدا دەژین و هەست بە بێبەشبوون دەکەن، بەردەوامبوون قورس دەبێت. دانانی دانەوێڵەی تەواو لە ژەمەکاندا یارمەتیدەرە باشتر بە بەرنامەکەتانەوە پەیوەست بن و کێشتان بەڕێوە ببەن.»
دانەوێڵەی تەواو پێکهاتووە لە: شۆفان، نانی گەنمی تەواو، کینوا، برنجی قاوەیی، فارۆ، هەرزن و پۆپکۆڕن. بە پێچەوانەی دانەوێڵەی پاڵاوتە کە توێکڵە دەوڵەمەندەکانی بە ڕیشاڵ و ڤیتامینی لێ جیا دەکرێتەوە، دانەوێڵەی تەواو چینە دەرەکییەکانی دەپارێزێت و هەڵگری ڤیتامینەکانی B و Eیە بۆ بەهێزکردنی بەرگریی لەش.
کلینیکی کلیڤلاند ئاماژەی بەوە کردووە ئەو کەسانەی دانەوێڵەی تەواو بە ڕێژەیەکی زۆر بەکار دەهێنن، کێشی لەشیان کەمترە و کەمتر تووشی کۆبوونەوەی چەوری لە نێوەڕاستی لەشیاندا دەبن. بە گوێرەی کلینیکی مایۆ، دانەوێڵەی تەواو لە بەرانبەر نەخۆشییەکانی دڵ، شەکرەی جۆری ۲ و شێرپەنجە ڕۆڵی پارێزەر دەگێڕێت. نێوەندی شێرپەنجەی «ئێم دی ئەندەرسۆن»یش باسی لەوە کردووە ڕیشاڵ و دژەئۆکسێنەرەکانی نێو دانەوێڵەی تەواو مەترسیی شێرپەنجە کەم دەکەنەوە.
ئانالیس پرات، پسپۆڕی بواری خۆراک گوتی بنەمای سەرەکی بۆ پاراستنی تەندروستی بریتییە لە دروستکردنی هاوسەنگی لە نێو سیستەمی خۆراکیدا.
