دوای تێپەڕبوونی 12 ساڵ بەسەر کۆچی دوایی ڕۆبین ویلیامز، زاک ویلیامزی کوڕی قسە لەبارەی وردەکارییەکانی مانگەکانی کۆتایی ژیانی باوکی و ئازارەکانی دەکات.
زاک ویلیامز لە تەمەنی 43 ساڵیدا لە بەرنامەیەکی پۆدکاستدا باسی لەوە کرد، باوکی لەو سەردەمەدا ڕووبەڕووی ڕۆژگارێکی زۆر سەخت بووەتەوە و بەردەوام هەوڵی داوە تێگەیشتن بۆ بارودۆخی بدۆزێتەوە و پشتیوانی بەدەستبهێنێت.
زاک ئاماژەی بۆ ئەوە کرد، بینینی باوکی لەو بارودۆخەدا ئەزموونێکی ئازاربەخش بووە بەتایبەت کە لەو بڕوایەدایە باوکی دوور نەبووە لە دۆزینەوەی ڕێگەچارەیەک کە هاوکاری بێت بۆ دەستکەوتنی ئارامی.
زاک جەختی لەسەر خۆشەویستی قووڵی خۆی بۆ باوکی کردەوە و گوتی، هەست بە ئازار دەکات چونکە نەیتوانیوە بە بڕی پێویست ئەو خۆشەویستییەی پێ بڵێت.
ڕۆبین ویلیامز لە 11ی ئابی 2014 لە تەمەنی 63 ساڵیدا کۆتایی بە ژیانی هێنا و دواتر پشکنینە پزیشکییەکان دەریانخست کە تووشی نەخۆشیی دەمارگیری بووبوو کە کاردەکاتە سەر توانای بیرکردنەوە و جوڵە.