ئەمڕۆ دوو ساڵ بەسەر هەڵبژاردنی خولی شەشەمی پەرلەمانی کوردستاندا تێدەپەڕێت؛ هەڵبژاردنێک کە دەبوا وەک وێستگەیەکی گرنگ بۆ ڕاستکردنەوەی ڕێرەوی حوکمڕانی و بەهێزکردنەوەی دامەزراوە فەرمییەکانی هەرێم بخوێنرایەتەوە، بەڵام بەداخێکی گەورەوە، تا ئێستاش پەرلەمان پەکخراوە و نەیتوانیوە ئەرکە بنەڕەتییەکەی خۆی لە چاودێریکردن، داکۆکیکردن لە مافەکانی خەڵک و بەهێزکردنەوەی قەوارەی هەرێم ئەنجام بدات.
جەوهەر نامیق سوارە ئەندامی پەرلەمانی کوردستان لەفراکسیۆنی پارتی بۆ زاگرۆس گوتی: لەم یادەدا، جەخت لەوە دەکەینەوە کە پەرلەمان موڵکی هیچ حیزب و لایەنێکی سیاسی نییە، بەڵکو سەنگەری یەکەمی خەڵک و مێژووی خەباتی ئەم گەلەیە. بەستنەوەی کاراکردنەوەی پەرلەمان بە ململانێی حیزبی و بەرژەوەندیی تەسکەوە، سووکایەتیکردنە بە ئیرادەی ئەو دەنگدەرە ماندووەی کە بە هیوای داهاتوویەکی باشتر ڕووی کردە سندووقەکانی دەنگدان.
راشی گەیاند: قەوارەی هەرێمی کوردستان لەبەردەم مەترسی و تاقیکردنەوەیەکی مێژووییداردایە، پاراستنی ئەم قەوارەیەش تەنها بە یەکڕیزی، گەڕانەوە بۆ دەستوور و یاسا، و کاراکردنەوەی دەزگا شەرعییەکان دەکرێت، نەک بە پەراوێزخستن و پەکخستن.
بۆیە، داوا دەکەین ئەم دۆخە نەخوازراوە کۆتایی پێبێت و هەموو لایەک بەرژەوەندیی باڵای نەتەوەیی و نیشتمانی بخەنە سەروو هەموو بەرژەوەندییەکی حیزبییەوە، تا بتوانین پەرلەمان بکەینەوە بە لانکەی پێکەوەژیان، دیموکراسی و بەدیهێنانی مافە ڕەواکانی خەڵکی کوردستان.