دوێنێ سێشه‌ممه سەرۆکی ڕووسیا ڤلادیمیر پوتن، سه‌ردانی كۆریای باكووری كرد و له‌گه‌ڵ كیم جۆن ئون كۆبووه‌وه، له‌مباره‌یه‌وه، بەرپرسی پێشووی ئاسایشی نیشتیمانی ئەمەریکا، وتی، کۆبوونەوەکە لە دوای جەنگی کۆریاوە بۆ سەر ئاسایشی نیشتیمانی ئەمەریکا گەورەترین مەترسییە.
ڤیکتۆر چا، بەرپرسێكی پێشووی ئاسایشی نیشتیمانییه و ئێستا لە ناوەندی توێژینەوە ستراتیژی و نێودەوڵەتییەکانە، وتی ” ئەم پەیوەندییە، کە مێژووییە و بەهۆی جەنگەکەی ناو ئۆکرانیاوە سەریهەڵدایەوە، ئاسایشی ئەوروپا و ئاسیا و ئاسایشی ناوخۆی ئەمەریکا دەخاتە مەترسییەوە.”
هەروەها داوای لە واشنتن کرد لەگەڵ ئەوروپا و هاوبەشەکانی دیکەدا کار بۆ زیادکردنی فشارە ئابووریی و دیبلۆماتییەکانی سەر کۆریای باکوور بکات، هەروەها گفتوگۆکردن لەگەڵ چیندا، هەروەها دەستپێکردنی کەمپینێکی مافەکانی مرۆڤ و زانیارییەکان بۆ ئەوەی میدیاکانی دەرەوە بچنە کۆریای باکوورەوە.
لە ساڵی 2006 ەوە کۆریای باکوور لە ژێر سزاکانی نەتەوە یەکگرتووەکاندایە بەهۆی بەرنامە ئەتۆمی و موشەکە باڵیستیکییەکەیەوە، بە تێپەڕبوونی کات ئەو سزایانە توندتر کراونەتەوە.
سەرۆکی ڕووسیا ڤلادیمیر پوتن ڕۆژی سێشەممە بەڵێنیدا پەیوەندییە بازرگانی و ئاسایشییەکانی لەگەڵ کۆریای باکووردا قووڵتر بکاتەوە و پشتیوانی لەو وڵاتە دژی ئەمەریکا بکات، ئەمەش لە کاتێکدا کە بۆ یەکەمین جار لە ماوەی 24 ساڵدا سەردانی کۆریای باکوور دەکات.
دەزگای هەواڵی ئینتەرفاکسی ڕووسیا وتی سەردانەکە بریتی دەبێت لە کۆبوونەوەیەکی ڕاستەوخۆی نێوان پوتن و کیم، هەروەها بەشداریکردن لە کۆنسێرتی گالا و پێشوازیکردن و واژۆکردنی بەڵگەنامەکان و دەرکردنی بەیاننامەیەک بۆ میدیاکان.
دوای سەردانەکەی بۆ کۆریای باکوور، پوتن لە 19-20 ی مانگی شەشدا سەردانی ڤیێتنام دەکات.