هێزی بەرگریی ئاسمانیی ئۆکرانیا بڵاویکردەوە، شەوی ڕابردوو رووسیا هێرشی فراوانی درۆنی بۆسەر دوو ناوچەی خارکێڤ و دۆنێتسک ئەنجامدا، بەڵام هێزەکانیان توانیان لە کۆی ٣٩ درۆنی جۆری شاهیدی ئێرانی کە لەلایەن سوپای رووسیاوە بەکارهاتن، ٣٥ درۆنیان تێکبشکێنێت.
لەلایەکی دیکەوە فەرمانداری هەرێمی دۆنێستک ئاشکرای کرد، رووسیا به سیستەمی ئێس ٣٠٠هەرێمەکەیانی بۆمباباران کردووە و بەهۆیەوە لانیکەم نۆ کەس برینداربوون و کۆمەڵێک باڵەخانەش زیانیان بەرکەوتووە.
لە کاتێکدا هەواڵی هێرشی درۆنیی رووسیا بە درۆنی شاهیدی ئێرانی بۆ سەر ئۆکرانیا بڵاو دەبێتەوە، لە چەند رۆژی رابردوودا ئەمریکا و وڵاتانی ئەوروپایی سزای نوێیان خستووەتە سەر حکومەتی ئێران و دەڵێن ئێران سەرەڕای ناردنی درۆن بۆ رووسیا موشەکی بالستیکیشی بۆ دەنرێت.