وەزارەتی بەرگری ئەمەریکا دەڵێت بەرپرسانی ئەمەریکا هەفتەی ڕابردوو سەردانی نایجەرییان کردووە بۆ دەربڕینی نیگەرانییەکانییان سەبارەت بە ئەگەری گەشەکردنی پەیوەندییەکانی وڵاتەکە لەگەڵ ڕووسیا و ئێراندا، پێش ئەوەی کە ئەنجومەنی سەربازیی فەرمانڕەوا لە نایجەر ڕێککەوتنێکی سەربازیی گرنگی هەڵوەشاندەوە کە ڕێگەی دەدا بە بوونی سەربازانی ئەمەریکا لە وڵاتەکەدا.
وتەبێژی وەزارەتی بەرگری ئەمەریکا سابرینا سینگ وتی ” شاندەکەی ئەمەریکا لەوێ بوو بۆ دەربڕینی چەندین نیگەرانی، ئێمە بێزار بووین سەبارەت بەو ڕێگایەی کە نایجەر لەسەری بوو. لەبەرئەوە ئەمانە گفتوگۆی ڕاستەوخۆ و ڕاشکاو بوون، ئەم گفتوگۆیانە دەبووایە ڕووبەڕوو بوونایە بۆ ئەوەی باس لە نیگەرانییەکانی خۆمان بکەین و گوێبیستی نیگەرانییەکانی ئەوانیش بین.”
کاتێک داوای لێکرا ڕوونکردنەوە بدات لەسەر ئەو نیگەرانییانە، سینگ وتی ” بەرپرسانی ئەمەریکا نیگەرانییان دەربڕیوە سەبارەت بە پەیوەندییەکانی نایجەر لەگەڵ ڕووسیا و ئێراندا.”
voa