رۆژی سێشەممە، بە ئامادەبوونی ئومێد خۆشناو، پارێزگاری هەولێر و هونەر نورى، بەڕێوەبەرى گشتیى رێگاوبانى هەولێر و ژمارەیەک لە بەرپرسان و ئەندازیاران، کۆتایی بە خولێکی راهێنانی ژیریی دەستکرد هات.
خولەکە بۆ (36) ئەندازیارى سنووری بەڕێوەبەرایەتیەکانى رێگا و بانى هەولێر رێکخرابوو و بڕوانامەى خول بەسەر بەشداربووانى دابەشکرا.
لە خولەکەدا، کە بۆ ماوەى سێ رۆژ بەردەوام بوو، نوێترین پێشکەوتنەکان و چۆنیەتى بەکارهێنانی ژیریی دەستکرد پێشکەشکرا، لەوانە فێرکردن و راهێنان لەسەر چۆنیەتى بەکارهێنانى ئامرازەکانی (AI) بۆ مەبەستی رایکردنى کاروبار و ئەرکە ئەندازەییەکان، جگە لە پێشکەشکردنى کۆمەڵێک میکانزم و ئامرازى جیاواز بەئامانجى گرنگیدانى زیاتر بە تێکەڵکردنی زیرەکی دەستکرد لە ژینگەی کارەکانیان بۆ باشتر بەڕێوەبردن و رووبەڕوبوونەوەى ئاستەنگە و ئاڵنگارییەکان.
لە رێورەسمەکەدا، پارێزگارى هەولێر، وێڕاى دەست خۆشى لە ئەندازیار ئەسعەد عەلی، یاریدەدەری بەرێوەبەری گشتیی بۆ کاروباری رێگاوبان و وانەبێژى خولەکە، پیرۆزبایی لە ئەندازیارانى بەشداربووى خولەکە کرد و ئومێدى سەرکەوتنى بۆ خواستن.