ئەمڕۆ سێشەممە 2025.9.23، بە ئامادەبوونی ئومێد خۆشناو، پارێزگاری هەولێر و د.محەمەد شوکرى، سەرۆکى دەستەى وەبەرهێنان و سەروەر کمال، بریکاری وەزارەتی بازرگانی و پیشەسازیی و کونسڵ و نوێنەرانی وڵاتان لە هەولێر و سەرۆك و ئەندامانی ژووری بازرگانی و ژمارەیەکى تر لە بەرپرسانی ئیداری و پیاوانى کار، لە پێناو بەرەوپێشبردن و پەرەپێدانی كەرتی پیشەسازیی و بیناسازیی لە هەرێمی كوردستان و نمایشكردنی كەرەستە و ئامێرە پێشكەوتووەكانی ئاوەدانكردنەوە و خستنەڕووی نوێترین بەرهەمەکانی ” حەفتەمین پیشانگای نێودەوڵەتی پیشەسازیی و کەرستەی بیناسازیی” لە پیشانگای نێودەوڵەتی هەولێری پایتەخت بە بەشداری ( 20 ) وڵات و ( 400 ) كۆمپانیا كرایەوە.
پیشانگاكە كە ماوەی ( 3 ) ڕۆژە بەردەوام دەبێت، تێیدا تازەترین بەرهەم و كەرەستە و كەل و پەلی مۆدرێنی تایبەتە بە کۆمپانیا پیشەسازیی و کەرەستەی بیناسازیی ناوخۆی هەرێمی کوردستان و وڵاتانی بیانی تێیدا نمایشكراوە و نوێترین کار و بەرهەم و ئۆفەرەكانی بۆ هاووڵاتییان خراوەتەڕوو، ئەمەش گرنگیەكی زۆری هەیە بۆ لە نزیکەوە ئاشنابوونی هاوڵاتییان بە کەرستە و ئامێر و پێداویستیە سەردەمیەكانی پیشەسازیی و بیناسازییەكان.
دوای کردنەوەی پیشانگاکە و بەسەرکردنەوەی بەشەکانی، پارێزگاری هەولێر، وێڕای بەرزنرخاندنی ئەو هەنگاوە، دەستخۆشی لە سەر پەرشتیار و كۆمپانیا بەشداربووەكانی پیشانگاکە کرد و ئومێدیشی خواست كردنەوەی ئەم پیشانگاییە ببێتە هۆکارێک بۆ زیاتر بەرەوپێشچوونی كەرتی پیشەسازیی و بیناسازیی لە هەولێری پیاتەخت بەتایبەتی و هەرێمی کوردستان بەگشتیی.