وەزارەتی بەرگریی عێراق ئەو تەکنەلۆجیا لۆجستی و تەکنیکه نوێیانەی راگەیاند کە خراونەتە ناو پلانی ئاسایشی تایبەت بە هەڵبژاردن و دووپاتیکردەوە کە ئاسایشی سایبەری و زیرەکی دەستکردیان لە پلانی دابینکردنی ئاسایشی پڕۆسەی هەڵبژاردندا بەکارهێناوە.
لیوا تەحسین خەفاجی، بەڕێوەبەری راگەیاندن لە وەزارەتی بەرگری رایگەیاند: “پلانی ئاسایشی تایبەت بە هەڵبژاردن، ئاسایشی سایبەری و زیرەکی دەستکرد، چاودێری ئاسمانی و تەکنیکی لە پڕۆسەی مامەڵەکردن لەگەڵ زانیارییەکان و شیکردنەوە و گواستنەوە و هەماهەنگیکردن لەنێوانیاندا بەکارهێناوە.”
دووپاتیشیکردەوە کە “چەندین تەکنەلۆجیا و توخم خراونەتە ناو پلانی ئاسایشەوە کە بەشداری لە پەرەپێدانی دەکەن.”
وتیشی: “دۆخەکە جێگیرە و تواناکانی هێزە ئەمنییەکانمان زۆر بەرزە و گرنگترین شت بریتییە لە سووربوونی هاووڵاتی و هاوکارییەکەی بۆ پاراستنی سەقامگیری نیشتمانی.”