وەزارەتی دەرەوەی ئەمریکا، لە ڕێی بەرنامەی “پاداشت بۆ دادپەروەری”یەوە، بڕی دە ملیۆن دۆلاری ئەمریکایی وەک پاداشت دیاری کردووە بۆ هەر زانیارییەک کە ببێتە هۆی ناسینەوە و دۆزینەوەی دوو هاووڵاتیی ئێرانی بە ناوەکانی فاتمە سدیقیان کاشی و محەممەدباقر شیرینکار. ئەم دوو کەسە بە ئەندامانی گرووپی “شەهید شوشتەری” ناسێنراون، کە سەر بە فەرماندەییی سایبەری-ئەلیکترۆنیی سوپای پاسدارانی ئێرانن.
وەزارەتی دەرەوەی ئەمریکا ڕای گەیاندووە، ئەم کەسانە بە ئاڕاستەکردن یان کۆنترۆڵی حکوومەتێکی بیانی و بە پێشێلکردنی یاساکانی فێڵ و خراپ بەکارهێنانی کۆمپیوتەر، هێرشی سایبەرییان کردووەتە سەر ژێرخانەکانی ئەمریکا. بە پێی ئەو ڕاگەیاندنە، گرووپی “شەهید شوشتەری” کە پێشتر بە چەند ناوێکی تر وەک “ئاریا سپهر ئایەندەسازان”، “ئایەندەسازان سپهر ئاریا”، “ئێمن نێت پاسارگاد”، “ئیلیانت گۆستەر” و “نێت پەیگەرد سەماوات” ناسراو بووە، بە ئەنجامدانی ئۆپەراسیۆنە سایبەری و زانیارییە هەماهەنگەکان، زیانێکی زۆری دارایی و تێکچوونی کارەکانی بۆ کۆمپانیا و ڕێکخراوە حکوومەتییەکانی ئەمریکا هێناوەتە کایەوە. ئەم هەڵمەتانە ژێرخانە گرنگەکانی وەک کەرتەکانی هەواڵ، گواستنەوەی دەریایی، گەشتوگوزار، وزە، دارایی و پەیوەندییەکانی لە ئەمریکا، ئەوروپا و ڕۆژهەڵاتی نێوەڕاست کردووەتە ئامانج.
لەمبارەیەوە، محەممەدباقر شیرینکار وەک سەرپەرشتیاری گرووپەکە و فاتمە سدیقیان کاشیش وەک کارمەندێکی دێرین و هاوکار لە پلاندانان و جێبەجێکردنی ئۆپەراسیۆنە سایبەرییەکاندا ناسێنراون. ئەمریکا گوتوویەتی، لە ئابی ٢٠٢٠ەوە، ئەکتەرەکانی گرووپی “شەهید شوشتەری” هەڵمەتێکی چەند قۆناغییان بۆ تێکدان و کاریگەری لەسەر هەڵبژاردنی سەرۆکایەتیی ئەمریکا دەست پێ کردووە و پێشتر بە بەکارهێنانی “ناسنامەی ساختە” لە “ئۆپەراسیۆنەکانی زانیاری و سایبەری”دا چالاک بوون.
وەزارەتی خەزێنەی ئەمریکاش لە تشرینی دووەمی ٢٠٢١دا گرووپی “شەهید شوشتەری”ی (کە ئەو کاتە بە ناوی “ئێمن نێت پاسارگاد” کاری دەکرد) لەگەڵ شەش کارمەندیدا، بە هۆی هەوڵدان بۆ کاریگەری دانان لەسەر هەڵبژاردنەکانی ٢٠٢٠ی ئەمریکا، گەمارۆی خستووەتە سەریان. واشنتن، تاران بە ئەنجامدانی هێرشی سایبەری دژ بە کەرتەکانی بانکیی ئەمریکا لە نێوان ساڵانی ٢٠١١ بۆ ٢٠١٣ تۆمەتبار دەکات، هەروەها بە ئۆپەراسیۆنەکانی دژ بە دامەزراوەکانی ئاو و کۆمپانیاکانی گواستنەوە و وزە لەم ساڵانەی دواییدا. لە لایەکی ترەوە، ئێران دەڵێت دامەزراوە ئەتۆمی و پیشەسازییەکانی بە بەردەوامی لە ژێر هێرشدا بوون، کە دراونەتە پاڵ ئەمریکا و ئیسرائیل؛ لەوانەش هێرشێکی گەورەی سایبەری کە لە ساڵی ٢٠٢١دا کرایە سەر دامەزراوەی “نەتەنز”. ئەم گرژییە سایبەرییە دوولایەنە، بووەتە هۆی ئەوەی کە کەشە سایبەرییەکان ببنە یەکێک لە گرنگترین گۆڕەپانەکانی گرژی لە نێوان هەردوو وڵاتدا، لە کاتێکدا هۆشداریی بەردەوامی ئەمریکاییەکان لەسەر پەرەسەندنی تواناکانی سایبەریی ئێران و زیادبوونی ئامانجگرتنی ژێرخانە گرنگەکان لە نێو ئەمریکا و هاوپەیمانەکانییدا هەیە.